Shillong, Risaw, 14: Ki shipai Border Security Force (BSF) jong ka 172 Battalion Meghalaya ha ka sngi thohdieng ki la pynpulom ïa ka jingthmu jong ki runar ban shalan tuh 56 tylli ki masi na khappud jong ka Jylla Meghalaya hapoh ki 48 kynta ba la leit noh.Ïa kine ki masi la thmu ban shalan beaiñ sha ka ri Bangladesh lyngba ka khappud jong ka East Jaiñtia Hills.
Ki shipai BSF kiba la ïoh ïa ka jingtip kaba bniah, ki la pynlong ka jingap ktem bad ïohbat ïa kawei ka kali ha jingkieng Sonapur, East Jaiñtia Hills. Katba ki shipai BSF ki la aidak ban pynsangeh ïa ka kali, hynrei u nongñiah u pynher pynstet ïa ka kali sha surok ban leit sha ka shnong Umkiang. Ha ka jingïabeh thong, ki shipai BSF ki la ïoh khang kdong ïa ka kali bad kurup noh ïa ki masi. Katba u nongñiah jong ka kali u la phet krad ïalade da kaba shim kabu ïa ka jingrben jong ka khlaw bad ka jingdum jong ka miet bad iehnoh shadien ïa ki masi bad ïa ka kali.
Haduh 35 tylli ki masi ba la thyngian hapoh ka kali ba la kurup da ki shipai BSF la aiti noh sha ki Pulit jong ka Umkiang Out Post ban leh ïa kaba donkam katkum ki kyndon jong ka aiñ. Ha kawei pat ka jingpynap ktem, kane ka kynhun shipai ka la ïoh kurup 21 tylli ki masi ïa kiba la buhrieh ha kawei ka lawbniap ha khappud da ka jingthmu ban shalan be-aiñ sha ka ri Bangladesh.
