Shillong, Risaw, 14: Ka Khasi Students Union (KSU) East Jaiñtia Hills District Unit lyngba ka Education Cell ha ka sngi Thohdieng ka la ujor da ka jingthoh sha u Director jong ka School Education and Literacy (SEL) u Swapnil Tembe bad sha ka Director jong ka Educational Research and Traning (ERT) ka Kong R.S Manner ka jingpynjot dumon jong ki briew ïa ka Residential School bad ïa ka Block Institute of Teachers Education (BITE) ba la shna da ka tnat Pule Puthi ha ka shnong Byndihati, East Jaiñtia Hills District.
Ka Seng ka la ujor ruh halor ka jingbym don nonghikai Science ha Rymbai Governement Secondary School bad ka jingbym pyntreikam ïa ki ar tylli ki jaka pule kiba don ha Byndihati, kata, ïa ka Residential School bad ka Block Teachers Training Institute.
Ka seng kaba la ïoh ujor na ki paidbah, ha ka jingleit jurip ka la lap shisha ba ym don nonghikai ha ka Sobject Science ha Rymbai Govt Secondary School la kumba shi snem eiei bad ka seng ka lap ruh ba kane ka skul ka la khapngiah ki kamra kals namar ka jingbym biang ka building bad kiwei kiwei de ki jingdonkam kum ka Science Laboratory, ka Computers Lab bad ki ki nonghikai pura namarba bun na ki nonghikai ki dei kiba shu hikai shipor.
Ka KSU lyngba ka Education Cell ba la lamkhmat da u Asst. Education Secretary u samla SanTomba Bamon ka la ai jingmut ïa u Director ban kyntiew kyrdan ïa ka Rymbai Govt Secondary School sha ka Higher Secondary School namar kumba long mynta kane ka skul ka dei tang ma ka, ka Secondary School jong ka Sorkar ha baroh kawei ka East Jaiñtia Hills.
Na ka liang jong u Director u la pyntip ba ïa ka jingkyntiew kyrdan yn hap ban ïashong pyrkhat bha bad ka seng ka la pynsngew ba ka dei tang kane hi kawei ka skul ba la bei da ka Sorkar Jylla bad la i donkam bha ban kyntiew ïa ka sha ka kyrdan Higher Secondary School
Shuh shuh ka seng ka tip ruh ba ki don ki sobjek kiba ym don nonghikai pura bad kiba hap ban shim kylliang beit da ki para nonghikai jong ka skul.
Ha kaba ïadei bad ka Residential School bad ka jaka pule pyntbit ïa ki nonghikai ba la shu ieh lyngkrang khlem da ka pyntreikam satia mynta la phra snem eiei, ka seng ka la ïakren ha u Director jong ka DSEL bad ka DERT ban khmih biang bad ban ïakren bad ka Sorkar Jylla ban pyntreikam noh namar kan long ka jingmyntoi ïa ki khun samla ka thaiñ naduh kiba pule bad ha ka ïohkam ïohjam.
Ka seng ka la buddien ruh ïa ka jingiehshrah ïa ka Residential School bad ïa ka Block Institute of Teachers Education (BITE) ba don hapoh ka District bad ruh la ïoh jingtip ba ka tnat ba dei peit ka dang ïaleh ban ïoh pisa ban pynbha bad tei biang ïa ki khamtam na ka pisa ba la mang da ka Sorkar Pdeng.
Haba ïadei bad ka BITE ka seng ka la ïoh jingtip ba ïa kane ka projek ym shym lah ieh shrah hynrei ka dang don hapdeng ka jingpynkhreh ban pyntrei noh hadien ba ka tnat PWD ka la aiti sha ka tnat Pule Puthi. Shuh shuh ka seng ka la kyrpad ïa ki bor ba dei peit ba kin leit jurip ïa kine ki ar tylli ki Building bad ban tip haduh katno ka jingduhnong shwa ban shna pynbha khnang ba ka jingtei kan nym long kaba sepei.
Kane ka projek ka dei na bynta ka Block Institute of Teachers Education bad ka seng ka ka la dawa ba dei ban kyntiew kyrdan noh mardor sha ka District Institute of Teachers Education(DITE) khnang ba kan long ka jingïohnong ïa ka district hi baroh kawei.
Shuh shuh ka seng ka la pynsngew ruh ha kaba ïadei bad ka National Institute of Open Schooling (NIOS) bad halor kane, ka seng kan sa phah da ka jingthoh sha u Regional Director khnang ba ki nongshong shnong jong ka East Jaiñtia Hills District kin ïoh jingmyntoi bad kan long ruh ka jingmyn toi ïa ki khynnah skul kiba la pep skul shiteng por ban bteng biang ïa ki jingpule ki jong ki.
