Shillong, Nailur 04: KaHynñiewtrep Youths Council (HYC) Central Executive Council (CEC) ka la pynrem jur ia ka jingleh jong uwei u pulit uba phong jain iong uba kah dur ialade, uba lah bret da u Stun Grenade ha kawei na ki dukan jong ka longkmie Khasi.
“Katkum ka jingiohi lyngba ki video ba la saphriang kaba pyni ba une u Pulit u lah kawang ia u Stun grenade (tear gas) hapoh kane ka dukan kaba don ha Parking Lot mar pyrshah jong ka SBI Main Branch mynta ka sngi,” ong u kyrwoh da u General Secretary ka seng u Bah Roy Kupar Synrem.
“Kane ka jingleh jong une u pulit I kumba u don jingthmu ban shim ia ka jingim jong kiba don hapoh jong kane ka dukan kiba kynthup ia ki trai dukan bad ia ki nongwan bam. Shu donbok ba ha kane ka dukan kim shym lah pyndonkam ia ki tyndong shet (LPG Cylinder) hynrei te ka lah jia kaei kaei kaba sngewsih kat ban poi sha ka jingiap ruh ia kiba don hapoh kane ka dukan,” ong u kyrwoh.
“Na ka liang ka Seng ngi dawa ba dei ban pynshitom ia une u Pulit bad ia ki ophisar ki bym shym la lah ban teh lakam ia ki pulit lajong. Ha ka jingshisha haba pyndonkam ia ki tear gas dei ban da antad tang ban pynpra ia ki paidbah ym ban leit kawang sha ki dukan sha jong ki riew shimet. Ka Sorkar kadei ban pynlong da ka jingtohkit kaba laitluid la utei u pulit u bret ia utei u bom da ladae hi lane la don ki ophisar kiba aibor ia u ba un leh ia katei ka kam beain,” ong shuh shuh u kyrwoh.
“Ngi dawa ruh ba ki bor pulit bad ki bor synshar district ki dei ban pynshai naei ki ioh ia ka bor ba kin leit kawang ia kum kine ki tiar pynbthei hapoh ki dukan jong ki riew paidbah ki bym don bynta eiei bad ka jingjia ia kulmar. Ka Sorkar ka dei ban leit siew bai lutksan mardor ia ki trai dukan bad kumjuh ruh ka dei ban ai bai dawai ia kiba mynsaw ha katei ka dukan,” dawa ka seng.
