Shillong, Nailur 04: Ka Hynñiewtrep Youths Council, Umiam Circle, ba la lamkhmat da ki nongialam jong ka Circle ba kynthup ia u President bad u General Secretary bad ki dkhot, ha ka janmiet lah sngi U Blei ki la ioh bat ia artylli ki kali, kata, ka Force Traveller bad ka kali Sumo, kiba shong da ki barjylla kumba 25 ngut kiba wan na ka jylla Assam da ka jingthmu ban leit trei bylla ha karkhana Topcem Cement, Jaintia Hills bad kiwei kiwei ki jaka jong ka Sor Shillong.
Ha u kyrwoh ba la phah da u President ka HYC- Umiam Circle u Shinestar Kharpan, la ong, “ha ka jingtohkit da ki dkhot ka seng, la lap ba kine ki briew kim don satia ia ki kot ki sla kiba biang ba kin wanrung bad trei bylla hapoh ka Jylla jong ngi hynrei sngew lyngngoh ba kumno ki lait ban wan iaid lyngba ka Infiltration checkgate kaba don ha Byrnihat, Ri Bhoi District. Kumta, lah pynphai kylla noh ia kine ki kali ha ryngkat ki briew sha ki jaka kiba ki wan da ka jingmaham ruh ba kim dei ban wan khlem ki kot ki sla kiba biang.”
“Ngi pynrem jur ia kane ka jingleh jong ki pulit kiba ap ha katei ka Gate bad ngi kyntu ia kiba kidei ban shimkhia bad pyndep hok ia la ka kamram kaba lah bynshet ha ki. Kane ka jingleh jong ki ka lah pat ban buh jingma ia ngi kum ka Jaidbynriew,” u la ong.
“Na ka liang ka Seng ngin iai long kiba phikir bad peit pyrman bha bad pynlong ruh ka jingtalasi kaba khah khah khnang ba ngin ioh ban khanglad ia ka jingrung jingmih ki poiei ki poiwir ha kane ka Ri kaba ieid ka jong ngi nangne shakhmat ruh,” ong u kyrwoh.
