Shillong, Iaiong, 28: Ka Federation of Khasi Jaiñtia and Garo People (FKJGP) Central Body, ka la pynpaw ia ka jingsngewkhia kaba khraw bad ka pynrem jur halor ka jingkem jong ki Pulit ia u President jong ka North Eastern Hills University Students Union (NEHUSU) u samla Sandy Sohtun.
Ha u kyrwoh ba la phah da u Vice President ka FKJGP Central Body Samla Kitbok Nongphlang, ka seng ka la ong, “la sakhi ia ki kynrum kynram kiba la mih ha ka skulbah NEHU hadien ba ka kynhun jong ki samla pule jong ka skulbah NEHU hapoh ka jingialam jong u Samla Sandy Sohtun ban sei madan ia ki kam bamsap bad ki jingbym iaid beit iaid ryntih haduh ba la poi u pud ba ki samla pule jong ka skulbah NEHU kin pynlong ia ka jingshah thngan kaba khlem buhpor ban dawa ban weng kam mardor ia u Vice Chancellor. Ka jingshim sting jong ka sorkar jylla ban tuklar ia kane ka kam haduh mynta mynne ka dang pyndkhoh ia kiba bun ki rukom treikam ha ka skulbah NEHU.
“Ka FKJGP ka sngew ba ka jingshah pharep jong u samla Sandy Sohtun lyngba jong uwei u Nonghikai jong ka skulbah ka lah ban don kaei re kaei kaba sha lyndet ban set da u kak na ka shyntur jong ki samla pule ban dawa ia la ka jong ka hok ban saiñdur ruh na ka bynta ka jingiaid shaphrang jong ka skulbah,” la ong ka seng.
Haba kynthoh ia ka jingrung ki Pulit ha phyllaw ka skulbah NEHU, ka FKJGP ka ong, “ka jingrung jubor jong ki bor Pulit hapoh ka campus jong ka skulbah NEHU ha ka jaka ba kan long ka jingshngaiñ kan long pynban kum ka jingpyntiengpynsmiej ia ki samla pule jong ka skulbah. Ka Sorkar ka dei ban shimkhia mardor ia kane ka kam ban tehlakam bad ban thung da ka kynhun tohkit ka bym noh shiliang khnang ba ki jingshisha kin paw pyrthei.”
“Kum ka seng na ka por sha ka por ka la ju ioh ia shibun ki jingujor halor ka jingshah ñiewbeiñ bad shah leh shiliang khmat ym tang ia ki samla pule hynrei wat ia ki nongtrei hapoh ka ka skulbah kiba la wan jia ha ki dur bula ki bapher bapher lyngba ka jingngeit niam bapher bapher bad kumta ter ter, kumta ka seng ka maham jur ia ki bor kiba nabar ba kim dei satia ban pyrshang ban ialam bakla bad ban balia siangsdieh da kaba pyrshang ban tap eitmiaw ia ki kam ba uta u Vice Chancellor u la leh ban pynjah burom ia ka NEHU ha kaba ki samla pule bad wat ki nongtrei kiba don don ka ka Skulbah NEHU kim mon shuh ia u ban dang long kum uta u khliehduh ban pyniaid ia kiei kiei baroh,” la bynrap u kyrwoh.
Ka FKJGP ka la ong ruh ba kan sa tih tyllong ia kiei kiei baroh bad kan ym shong kli kti satia halor ki jinglong jingman jong ka skulbah NEHU bad kum ka seng kan ym ailad ba ki samla trai ri kin shu kylla long ki langkñia tang na ka bynta ka jingmyntoi jong ki briew kiba nabar kiba don bynta ha ka saiñpyrthei jong ka ri India.
