Shillong, Nailur, 12: Ka Thma U Rangli ka pynrem jur ia ka kynhun ka seng shit niam Hindu kaba la kam ba la ialam da uta u riewkhuid Jagatguru Shankaracharya Swami Avinmukteshwarananda Saraswati kaba la iaid kylleng ka Ri India ban iawer paidbah sha ka jingialang bad jingiaid paidbah ban pyrshah ia ka jingot doh Masi ka ban long ha Shillong ha ka 2 October 2024. Ka jingthmu jong kane ka rally ki kynhun shitniam Hindu ka long ban dawa ban khang noh ia ka jingot doh masi ha baroh kawei ka Ri India.
Kane ka jingkhot bad jingdawa ban khang ban ot doh masi ha ka Ri India ka dei ka mat ba ka kynhun shit niam ba heh paid jong ka niam Hindu ka thmu ban pynbor ia kiwei pat ki jaitbynriew kiba pher kiba im ha Ri India ban im, ban bam bad ban ngeit kumba ngeit ma ki, ki heh paid Hindu. Phewse, kane ka long pyrshah ia ka Riti Synshar ka Ri bad ka wanrah ia ka jingpyniapher niam bad ka dei ruh ka jingleh donbor jong ki shitniam heh paid Hindu kiba thmu ban synshar donbor ia ka Ri India bad kiba thmu ban phrung jubor ha ka synshar khadar bad imlang sahlang tang kawei ka ktien, kawei ka niam bad kawei ka kolshor, ong u kyrwoh ba la phah da ka convenor ka TUR Kong Angela Rngad.
Ka pyrthei India ka dei ban tip ba ki nongshong shnong ka Jylla Meghalaya ki dei kiba bam doh, naduh ka doh sniang, ka doh masi bad kiwei ki jait doh. Ki don ruh ki shnong hapoh ka Jylla Meghalaya ha kaba ki trai ri ki pyndonkam ne pyniap da ki sniang, ki masi ha ka phur ka siang ne ka knia ka khriam. Kumta ka jingthmu ban pynlong ia ka jingiaid paidbah ban khang ot doh masi bad ban pynieng ia kata ka lama ban iada ne mane ia ka masi ha Nongbah Shillong kam dei ka hok ban mane blei laitluid , hynrei ka dei ka jingpynibor bad ka jingsdang jong ka jingsynshar donbor ki kynhun shit niam ka niam heh paid Hindu, ong u kyrwoh.
Kumta ka TUR ka pynrem jur ia kane ka jingthmu bad ka jingwan jong kane ka kynhun shit niam Hindu kaba wanrah ia ka jingkulmar. Ka TUR ka dawa na ka Sorkar bad bor District ba kim dei ban ai jingbit bad ba ka Sorkar Meghalaya ka dei ban khang shi syndon ia ka jingtreikam kane ka seng ha ka Jylla.
Lada ka Sorkar ne bor District kim khang ia kane ka jingialang paidbah kaba la khot da kane ka kynhun shit niam Hindu ha ka 2 October 2024, na ka liang ka TUR ruh ka khot ia baroh ki nongshong shnong kiba ngeit ha ka Riti Synshar bad kiba ieid ia ka jingsuk bad jingshong suk ban ialum ha kajuh ka jaka ba pynlong ia kata ka rally khang doh masi. Bad na ka liang ki paidbah nongshong shnong ka Shillong pat kin pynlong da ia ka jingia bam don masi bad kiwei de ki jait jingbam tynrai jong ki trai ri trai muluk ka Jylla Meghalaya, la bynrap shuh shuh ka TUR.
