Shillong, Lber, 20: Ban pynsah jingkynmaw ia ka jingiaid lynti kaba 46 snem jong ka seng, ka Khasi Students Union (KSU) Mawlai Circle ha ka sngi Balang ka la aiti ia ka ïing ba ka seng ka la pynshna monsngewbha sha ka Kong Regina Jyrwa, ka longkmie kaba don khun 10 ngut bad kaba im kamai jakpoh da kaba shu bylla sngi ban pyndap pynbiang ia ka iing ka sem bad ia ki khun ki kti.
Kaba sngewtynnad shuh shuh ka long ba ia ka jaka ba la shna ia ka iing kaba saw kamra la ai sngewbha da ka Kong Streamlet Kharbhih.
Ia kane ka ing, la plie paidbah da u General Secretary jong ka KSU Central Executive Council u samla Donald Thabah ryngkat ka jingsakhi lang jong ki nongïalam ka seng, ki nongïalam jong ka Federation of Khasi Jaintia and Garo Peoples (FKJGP), ki longkpa bad ki longkmie jong ka Block-X ka Mawlai Nongkwar, Shillong, u Rangbah Shnong ka Mawlai Nongkwar Bah M.Rumnong, Secretary shnong Bah Ezekiel, Vice President ka KSU CEC Biangbor Paliar uba dei ruh u President ka KSU Mawlai Circle bad kiwei kiwei.
Ha ka khyllipmat ba ka Kong Regina ka la pynpaw ia ka jingsngewnguh ia ki jingleh bha jong ka KSU, ka la jaw da ki ummat kiba kmen bad ha kajuh ka por ka la ai khublei kyrpang eh ia ka Kong Streamlet kharbih kaba la ai sngewbha ia ka jaka ban shna ia ka nongrim iing.
Ha kane ka sngi, ka KSU Shillong Mihngi Circle ka la noh synñiang da ki Laptop bad Computer sha ka skul jong ka Dorbar Shnong Nongmensong hapoh ka jingialam jong u Finance Secretary samla Khrawbor Kharkongor bad u Education Secretary samla Jeremaiah Pohthmi.
Ka jingnoh synniang jong ka seng ka long ban iarap ia ki khynnah kiba pule ha kane ka skul.
La pdiang ia kine ki jingai sngewbha na ka KSU synniang da ka Principal jong ka skul ryngkat ka jingsakhi lang jong ki nonghikai.
