Shillong, Lber, 20: Ki Pulit jong ka kynhun Anti Narcotic Task Force (ANTF) ka East Khasi Hills District ba la lamkhmat da ka Kong Sandra Nongdhar, MPS, hadien ba la ioh ia ka jingtip kaba bniah na ki tnat syntiat ha ka sngi Balang ki la iohkem ia ki arngut ki snar khaii drok na ka shong Happy Valley kaba hap hapoh ka Madanryting Police Station.
Katkum u kyrwoh ba la phah da u Superintendent of Police ka East Khasi Hills u Rituraj Ravi, ki arngut ki snar khaii drok ki dei kiba la tip kyrteng kum u Joshua Khiangte Tripura uba la 36 snem ka rta na uba na ka nongbah Aizawl, Mizoram bad uba sah mynta ha ka shnong Damchhara, Tripura. Katba uwei pat u dei uba la tip kyrteng kum u Joel Tripura uba la 29 snem ka rta uba sah ha ka shnong Kachharichara, Damchhara, North Tripura.
Na kine ki arngut ki Pulit ki la ioh kurup 11 tylli ki synduk thep sabon ba don ia u drok Heroin uba khia 139.98 gram, kawei ka Aadhar Card, kawei ka PAN Card, kawei ka Mobile Phone bad kawei ka kali Tata Sumo kaba don ia u nombar ML 05 N 0515.
Ki Pulit ki la register case hapoh ka NDPS Act bad ka jingtohkit ka dang iaid shakhmat.
