Shillong, Risaw, 15: Ka Kynhun Myntri ha ka sngi Balang ka la mynjur ban pynskhem ïa ka kam jong ki 1,000 ngut ki Nurse kiba la thungkam shipor (ad-hoc basis) ha ki kam ba la mang shwa u bnai Nohprah, 2007.
U Myntri Rangbah ka Jylla u Conrad K Sangma ha ka jingïakren bad ki lad pathai khubor hadien ba la wai ka jingïalang Kynhun Myntri u la ong, “(Ngi la mynjur) ban pynskhem ïa ki Nurse hapoh ka Meghalaya Nursing Service Appointment na ka bynta ka post Staff Nurse bad Auxilliary Nurse and Midwife.”
U la pyntip ba ka Sorkar ha u snem 2022 ka la pynskhem palat 3000 hajar ngut ki nongtrei kiba la shu thungkam shipor (adhoc basis) ha ki kam ba la mang shwa jong u Nohprah, 2007 da kaba pynshong nongrim katkum ka rai jong ka Ïingbishar Supreme Court.
Hadien la wanrah biang ïa ka thup jong kiwei pat kiba dei hok bad kiba hap ha kata ka kyrdan sha ka Kynhun Myntri bad ïa kine ruh la ai jingmynjur ban pynskhem.
“Kumjuh ruh mynta ka sngi ka tnad ka Koit ka Khiah ka la wanrah ïa ka thup jong ki 1000 ngut ki Nurse kiba don ruh ha kajuh ka kyrdan kiba la shah thungkam shwa u bnai Nohprah, 2007 bad ïa kaba la shu thungkam shipor kum ki Adhoc. Kumta, da kaba bud ïa kajuh ka jingthew bad kijuh ki kyndon kiba la pyntreikam ïa kiwei pat ki nongtrei kiba la thungkam shipor, ka Kynhun Myntri mynta ka sngi ka la rai ban pynbeit ryntih ïa kito kiba la shah thungkam Adhoc ha ki kam ba la mang shwa jong u bnai Nohprah, 2007,” u la bynrap.
