Shillong, Risaw, 29: Ka Sorkar Jylla ka la mynjur ban pynskhem ïa palat 283 ngut ki Special Education ha ka jylla. Ïa kane ka rai la shim ha ka jingïalang jong ka Kynhun Myntri ba la pynïaid da u Myntri Rangbah ka Jylla u Conrad K Sangma ha ka sngi Balang.
Ha ka jingïakren bad ki lad pathai khubor hadien ba la wai ka jingïalang, u Myntri ka Sorkar Jylla Bah Wailadmiki Shylla uba long ruh u nongaiktien jong ka Sorkar MDA u la ong, “Ka kynhun myntri ka la mynjur ban pynskhem ïa ki Special Educator (nonghikai ba kyrpang) bad ïa kiba trei kum kine kijuh ki jait kam katkum ba la bthah ha ka hukum jong ka Ïingbishar Supreme Court.”
U la pyntip ba mynta, ki don 283 ngut ki Special Educator kiba trei Contractual Basis bad da ka jingmynjur jong ka kynhun myntri la plie lad ban pynlong pynskhem ïa ka kam jong ki.
Ha kane ka sngi, ka Kynhun Myntri ka la mynjur ban shimti ïa ki skul Sarva Shiksha Abhiyan (SSA).
U Bah Shylla u la ïathuh ba dang shen u Myntri Rangbah ka jylla bad u Myntri ka tnat Pule Puthi ki la ïakynduh ïa ki nongïalam jong ki nonghikai skul SSA, kiba la kyrpad ban pyntreikam noh da ka rukom siew tulop ba thymmai bad ban shimti noh ïa ki skul SA.
Ka Sorkar ka la mynjur ïa ki jingdawa, la u la ong.
