Shillong, K’lyngkot, 27: Ka Sorkar Jylla ka la thawlad ban pynim ïa ki Village Defence Party (VDP) khnang ba kin peitngor ïa ka jingrung tuh jong ki mynder shapoh u pud u sam jong ka jylla Meghalaya namar ka jingbym shngaiñ ka jinglong jingman ha ka ri Bangladesh.
Ha ka jingïakren bad ki lad pathai khubor ha ka sngi Baar u Symbud Myntri Rangbah ka Jylla uba khmih ïa ka tnat Kam Pohiing u Bah Prestone Tynsong u la ong ba ka Sorkar kan sa phah pyntbit ruh ïa ki dkhot jong ki Village Defence Party (VDP).
“Kino kino ki mynder kiba wan rung sha ri India ki don ki aiñ ba pyrkhing. Ngi shim ïa ki sienjam katkum ki kyndon jong ka aiñ,” u la ong.
“Lada phi kren ïa kiba wan rung beaiñ, ka dei ka sobjek jong ka Sorkar Pdeng bad kam dei ka sobjek jong ka Sorkar Jylla. Namar ka jinglong jingman ba mynta ha ka ri Bangladesh, ngi la rai ban pynim biang ïa ki Village Defence Party (VDP) ha ki shnong kiba don ha khapppud bad ka ri Bangladesh bad ha ka jylla ba marjan,” la ong shuh shuh Bah Tynsong.
Haba kylli, u Bah Tynsong, u la ong, “ïa mynta ngi shngaiñ, ngam ong ba kam shngaiñ. Da ka jingtreilang jong ki shipai BSF, ka tnat Pulit jong ka jylla bad ngi la bthah ruh ïa ki bor synshar district ha ka jylla ba kin long kiba peitngor haba ïoh ïa kino kino ki jingtip.”
