Shillong, Naitung, 02: U Symbud Myntri Rangbah ka Jylla uba khmih ïa ka tnat Kam Pohing u Bah Prestone Tynsong u la maham ryngeh ïa kino kino ki riewshimet bad ki kynhun kiba donkti ban lum pisa beaiñ na iew na hat.
Ha ka jingïakren bad ki lad pathai khubor ha ka sngi Balang u Bah Tynsong u la ong ba ka aiñ kan sa leh la ka jong ka kamram lada lap ïa kino kino kiba donkti ha ki kam dawa pisa beaiñ.
Kane ka jingkren jong u ka long ha kaba ïadei bad ki shithi dawa pisa kiba ju sam khah khah da ka HNLC kaba la shah kheiñ beaiñ bad ki jinglum pisa be-aiñ da ki seng bapher bapher.
U Bah Tynsong u la kyntu ïa ki riewshimet bad nongkhaïi kiba ïoh ïa ki shithi dawa pisa ba kin pyntip mar mar sha ka Sorkar da kaba pynthikna ba kan sa leh ïa kaba donkam.
U la pynpaw ïa ka jingsngewkhia ba bun kiba ïoh pdiang ïa ki shithi jingdawa pisa kim ju pyntip sha ki bor ba dei peit, kaba khanglad ïa ki jingpyrshang ban weng ïa kane ka jingeh.
“Teng teng wat kito ki briew kiba ïoh ïa kum kine ki shithi ne kum ki jingdawa, kim ju ujor ne pyntip sha ki bor sorkar, kumta nga kyrpad ïa baroh kiba mad jingeh, lada ki ïoh ïa kino kino ki shithi dawa pisa na kano kano ka bynta, kin sngewbha ban wan shakhmat ban pyntip sha ka Sorkar bad yn sa leh ïa kaba donkam”, la bynrap u Bah Tynsong.
