Shillong, Risaw 30 : Ka Sorkar Meghalaya ka la pyntreikam ia ka Meghalaya Residents Safety and Security Act, 2016 ka la buh hakhmat ia ka jingthmu ban pynthikna ia ka jingshngaiñ jong ki nongshong shnong ka jylla da kaba bishar sani bha bin pa bin ia ki nongshong wai kiba sah ha kylleng ki bynta jong ka Jylla.
Ka jingpyntreikam ia kane ka Aiñ kan iada ia ki riew shim kabu bad ia ki runar ban ioh jaka rieh hapoh ka jylla bad ban pyrkhing da ka aiñ na ka bynta ban khanglad ia ka jingrung kyrthep be-aiñ bad ki nongbylla ba wan trei be-aiñ kiba lah ban rung bad sah ha ki shnong bapher bapher.
Na ka bynta ka jingpyntreikam ia kane ka aiñ, ka Sorkar da ka jingiatreilang bad ka NIC, Meghalaya ka la pynbna paidbah ia ka online application ha ka 8 tarik Nailur 2023 khnang ba ki nongshong shnong (trai iing/nongshong wai) kin dup lah ban pynrung kyrteng ialade da ka jingpynshisha na ki bor synshar shnong.
Namarkata, baroh ki trai iing/ki nongshong wai kiba sah hapoh ki hynñiew tylli ki shnong, kiba kynthup ia ka shnong Nongrim Hills, Pohkseh, Nongrah, Nongmensong, Lapalang, Riat Laban bad Wahdienglieng la jied ha ka wat ka banyngkong, ba ki dei ban pynrung kyrteng ialade ha ka App lyngba ka website https://megrssa.nic.in ia kaba lah ban plie lyngba ki PC, Laptop, Tablet bad Smart Phone. Ki trai ing bad ki nongshong wai ki lah ban pynrung kyrteng ruh lyngba ka Mobile App da kaba shu sei (downloaded) na ka website ba la kdew.
Ia ki kot ki sla ba donkam bad kiwei kiwei ki jingtip kiba bniah lah ban ioh na ka ophis jong ka Deputy Commissioner, East Khasi Hills, Shillong bad na ki Rangbah Shnong jong kine ki shnong ba la kdew haneng.
