Shillong, Naitung, 22: Namar ka kynrum kynram bad ka jingïakynad ha ka ri Bangladesh, ki shipai Border Security Force (BSF) Meghalaya Frontier kiba ap pahara ïa ka khappud India-Bangladesh kaba jrong 444 kilomitar ki la pynjur bha ïa ka jingpahara ha shilynter ka khapud da kaba pynlong ïa ka “Ops alert” khnang ban pynthikna ïa ka jingskhem ka jingïada ïa ka khappud.
U Inspector General (IG) jong ka BSF Meghalaya u Harbax Singh Dhillon u la ïathuh ba ka mat kaba kongsan tam eh ka dei ka jingshngaiñ ha ka jingwan phai jong ki samla pule nong India kiba pule ha ka ri Bangladesh.
Naduh ka 18 tarik Naitung, 2024, ka tnat shipai BSF Meghalaya ka la ïoh pdiang 574 ngut ki samla pule nong India, kumba 435 ngut ki samla pule jong ka ri Nepal, bad sa 8 ngut ki samla pule jong ka ri Bhutan lyngba ka khappud Dawki Integrated Check Post (ICP), East Khasi Hills District.
Shuh shuh sa 18 ngut ki samla pule ki la wan rung lyngba ka ICP Kilapara, West Garo Hills District, Meghalaya.
U Inspector General u la bthah ïa ki ophisar shipai BSF ban pdiang ïa ki nong India, khamtam ïa ka kynhun ki samla pule kiba wan rung lyngba ka ICP Dawki bad ICP Kilapara da kaba pynbiang ruh ïa ki lad jingïarap kum ka umbam umdih, ki song jingbam bad ki dawai dashin khnang ba kin poi suk sha la ki jong ki ing ki sem. U la ïathuh ruh ba la khmihlynti ba kin dang don shuh shuh ki samla pule ki ban wan namarba ka jingïakynad ka dang bteng ha ka ri Bangladesh.
Shuh shuh u la ong ba la pynjur bad la pynkhlaiñ ïa ka jingpahara ha khappud ka India-Bangladesh khnang ban khanglada ïa kano kano ka jingrung tuh da kino kino ki nongshong shnong.
