Shillong, Risaw, 18: Ka Kur Kharbuki na ka thain Mawpat bad Umsning ha ka sngi Balang ki la ieng pyrshah ïa ka jingai Sanad jong u Syiem ka Hima Mylliem ban pynskhem ïa ka jinglong Myntri jong u Bah Zuberstar Kharbuki bad ki la byrngem ban pynlong da ka jingshah thngan hakhmat ka ophis treikam jong ka Ophis u Syiem ka Hima Mylliem lada u Syiem um pyndam noh mardor ïa ka jinglong Myntri jong u Bah Zuberstar Kharbuki hapoh ka 26 tarik mynta u bnai.
Ïa u Bah Zuberstar Kharbuki la pynskhem kum u Myntri jong ka kur Kharbuki da u Syiem jong ka Mylliem Mylliem u Pa’iem Ainam Manik Syiem ha ka 13 tarik mynta u bnai da kaba pynkhamti ruh ïa ka Sanad jinglong Myntri jong ka Kur Kharbuki.
Ha ka jingïakren bad ki lad pathai khubor u President jong ka Kur Kharbuki Bah Diprilang Kharbuki u la kynnoh ba ka jingleh jong u Syiem ka Hima Mylliem ka dei ka jingsynshar donbor namar ba ha ka 9 tarik mynta u bnai Risaw ki la buh ïa ka dorkhas ban pyrshah hynrei na ka liang u Syiem ha ka 13 tarik mynta u bnai u la aiti syndon noh da ka Sanad ha u Bah Zuberstar Kharbuki ban pynskhem ïa ka jinglong Myntri jong u.
U Bah Cornilius Kharbuki u la pynpaw ba ka Seng Kur Kharbuki na ka shnong Lawmei ka shu leh donbor ïa ka kam jied Myntri wat hadien ba la don ka jingdawa ban pynlong da ka elekshon bad u la kynnoh ruh ba ki la shu leh sop sop bad ha ka 13 tarik mynta u bnai la pynskhem ïa u Bah Zuberstar Kharbuki kum u Myntri na Lawmei ban mihkhmat sha ka ophis jong u Syiem ka Hima Mylliem na ka Kur Kharbuki.
U Bah Krinson Kharbuki uba dei na ka thain Umsning Ri bhoi District u la pynpaw ba u Syiem u dei ban pyndam noh mardor ïa ka jinglong Myntri jong u Zubestar Kharbuki hapoh ka 26 tarik mynta u bnai Risaw hynrei lym kumta ka kur Kharbuki na Umsning bad na Mawpat kim banse ban dawa ïa ka hok da kaba leit shong shah thngan shynrang bad kynthei hakhmat ka ophis treikam jong u Syiem ka Hima Mylliem ha Mawkhar.
