Shillong, Risaw, 18: U Myntri ka tnat Jngohkai Pyrthei Bah Paul Lyngdoh u la pynphai nia sha ka STIEH da kaba ong, “manla ka sngi ka dei ka sngi khuid sngi kyntang bad kam dei satia tang kawei ka sngi ka sngi khuid katba kiwei pat ki sngi jong ka taiew ki dei ki sngi bym khuid.”
Kane ka jingpynphai nia jong u Bah Paul ka long halor ka jingpyrshah jong ka seng Saiñdur Tipkur Tipkha Ehrngiew Hynniewtrep (STIEH) ban pynkut ïa ka tamasa Shillong Cherry Blossom ha ka sngi U Blei, kata ha ka 19 tarik, Naiwieng, 2023. Kane ka tamasa kan sa long ha madan Kurkalang, Bhoirymbong naduh ka 17 tarik Naiwieng haduh ka 19 tarik Naiwieng, kaba hap ha ka sngi U Blei.
“Manla ka sngi ka dei ka sngi khuid bad ka sngi kyntang bad kam mut ba ki briew ki long khuid bad ngeit Blei tang ha kawei ka sngi jong ka taiew katba kiwei pat ki sngi ki long ki bym khuid,” la pynphai nia u Bah Paul.
Katei ka tamasa kaba ka sorkar ka pynkhreh ban pynlong shen ha u bnai ban wan la khmihlynti ba ki nongwan kai na kylleng ki bynta jong ka pyrthei kin poi sha ka shi lak ngut eiei.
Ha kitei ki sngi ka Sorkar ka la pynbna ruh ba kin don bun ki nongtem ba pawnam na shabar nalor ki nongtem nongput kiba kynsai na kane ka jylla.
