Shillong, Rymphang, 02: Ka Dorbar Shnong Pynthorumkhrah Golflink ha ka sngi Thohdieng, ha ka jingiakynduh ia u MLA ka Pynthorumkhrah Constituency u Bah Alexander Laloo Hek ka la pynpaw ia ka jingpyrshah kaba jur lada ka Shillong Golf Club (SGC) kan pyniaid ia ka Children’s Park bad ia ka jaka ialehkai Futsal kaba yn sa shna noh shen.
Ha ka jingialang, u Rangbah Shnong ka Pynthorumkhrah Golflink Bah Micheal Hek ha ka jingiakren bad u MLA u la pynpaw ba lada pyniaid hi da ka tnad Jngohkai Pyrthei ka Sorkar Jylla ka Dorbar Shnong kan ai ka jingiatreilang hynrei lada jia ba la aiti ban pyniaid sha ka Shillong Golf Club ka Dorbar Shnong kan pyrshah namarba kan long tang kum ka jaka kamai pisa jong ka Club.
Ha ka jingiakren bad ki lad pathai khubor, u Bah Micheal Hek u la ong ba lada ka Sorkar ka shimti ban pyniaid hi ruh ka dei ban pyntikna ba ki khun samla jong ka shnong kin iohkam iohjam.
“Ha ka jingshisha ngim don jingtip ba kin buh ia ka Park, dei ki nongkitkam shnong kiba pyntip ia nga bad ki la pyntip ruh ba dei ka Golf Club kaba la phah ia ka jingtyrwa sha ka Sorkar kaba la mang ruh ia ka skhim ban shna ia ka Park. Mar mar ngi la lum ia ka jingialang bad ngi la phah da ka jingthoh sha u Myntri Rangbah Conrad K. Sangma, sha u MLA Bah AL Hek bad sha u Myntri ka tnat Jngohkai Pyrthei Bah Paul Lyngdoh bad sha u Commissioner & Secretary ka tnat Jngohkai Pyrthei u Vijay Kumar,” ula ong.
“Ka long kaba sngewsih ba kat kane ka jingthmu kaba heh, hynrei ka shnong kam don jingtip eiei. Ka long kaba sngewlehrain wat ia ka Executive Committee jong ka Shnong. U MLA ula pynshai ba ka jingthmu ka long ban shna ia ka madan Futsal bad ka Children’s Park,” la iathuh u Bah Michael Hek.
U la iathuh ba u MLA u la pynshai ba kan don ruh ka jingiateh kular hapdeng ka shnong bad ba ka shnong kan ioh jngmyntoi bad yn aikam ruh sha ki samla jong ka shnong.
“Nga la kren shai u MLA ban iatreilang bad ka Sorkar kam don jingeh, lada ka pyniaid ka Sorkar kan don ka jingmyntoi ia ka shnong. Nga la kren pyrshah ia u MLA ba lada ka pyniaid ka Golf Club ngin pyrshah bad lada ka kam trai ia kane ka jaka bad lada ka pyniaid hi ka Golf Club, ka shnong kan pyrshah beit,” la ong u Rangbah Shnong.
Haba pynpaw shuh shuh ia ka jingpyrshah ban aiti ia ka jaka sha ka Shillong Golf Club, u Rangbah Shnong u la ong, “ka Golf Club ka la pynkylla ktem kamai nangne na ka madan Golflink. Ki wan ki Director ban iakren na ka bynta ban ker noh da ka jar nar namarba madan ka la sdang ban jot.”
“Nga la ong ruh ia u Director ka Golf Club ba u dei ban aikam noh hapoh 30 ngut ia ki khynnah samla jong ka shnong bad ban thep kam ia ki khynnah napoh ka shnong ha kaba u Director u la kular ban aikam ryngkat ka tulop kaba 10 hajar shi bnai. Ynda ki rangbah dong ki la ai ia ki aplikeshon jong ki khynnah samla ban thep kam, katba ka jingsiew tulop ka long tang T. 4-5 hajar. Na ka liang jong ngi hi, ngim treh ban iatreilang bad ka Golf Club lano lano ruh, shisien u briew uba la thok, dei na kata ka daw,” la kynnoh u Rangbah Shnong.
U la maham ruh ba ka Shillong Golf Club ka leh ia kano kano ka kam nangne shakhmat ka dei ban da pyntip sha ka Dorbar Shnong hynrei lym kumta ia ka jingkhrong pisa ban rung sha madan GolfLink ka Dorbar Shnong kan leit ban khang noh.
“Ka Shillong Golf Club kam dei ka Society ne ka NGO kaba iarap ia kino kino hynrei ka dei tang kaba shu kamai shimet,” la kynnoh shuh shuh u Rangbah Shnong.
