Shillong, Rymphang, 02: Uwei u rangbah uba la 30 snem ka rta la suba ba ula shah tep im ha ka jingtwa ka synrum jaboh ha ka jaka thehniut ha Marten, kaba don ha Mawlai.
Ia une u rangbah ba la shah tep im la tip kyrteng kum u Marshall Marweiñ. Tad haduh ba la thoh ia kane ka khubor ym pat lap satia ia une u rangbah haduh mynta.
Ki nongialam ka FKJGP Shillong City ki la pyntip ba ki bor ba dei khmih ha Marten wat hadien ba ki la tip ia kane ka jingjia ruh kim shym la leh eiei hynrei ka jingai jingiarap ban wad ia ka met jong une u briew ka la slem shaba palat
Ka kynhun ki Pulit na Mawlai Police Station ki la leit mar mar sha kane ka jaka hadien ba la ioh jingtip shaphang kanenka jingjia ba sngewsih.
La sakhi ruh ba ki Pulit ki la pyndonkam da ki Puhshilum ban kyndang ia ki niut khnang ban lap ia ka met jong uba la shah tep im.
Na ka liang jong ki nongtam marjot ha Marten ki la ong ba kane ka dei ka sien kaba nyngkong eh ban jia ka jingjia ba sngewsih ha kane ka jaka thehniut bad ki la ong ruh ba ka jingmih jong ka tdem jaboh na ka jingthang ding ia ki nuit ka la wanrah shuh shuh ia ka jingeh ban lap ia uba la shah tep im namar ba ka bneng ka la dum.
