Khliehriat, Naitung 12 : Ka Seng FKJGP-East Jaintia Hill mynta ka sngi ka la leit ai da ka Memorundum sha u Conrad K. Sangma, Chief Minister jong ka Sorkar Meghalaya MDA-II lyngba u Deputy Commissioner ka East Jaintia Hill. Ka Seng ka pynpaw ka jingpyrshah jur ia ka rai ka Sorkar MDA II ban wanrah ia ka lynti rel hapoh East Jaintia lyngba ka Khliehriat bad horkit hordang ka seng kan ym pdiang da leilei ruh ia kane.
Ngi iohi ba ka sorkar ka pynbiej ruh da kaba ong ba ia mynta kan wanrah tang ia ki rel kitmar, hynrei ha ka jingsngew jong ka seng lada ailad ia ka rel kit mar kan eh aiu ia ka sorkar ban pynwan syndon hadien da ka rel kit briew ne ka passenger train, ki paidbah kim dei ban sngewthuh bakla ba da ka jingwan ka lyntiu rel kan don ka jing hiardor ha ki marbam mardih, peit ka nuksa sha thain Garo la don lypa ka Railway hynrei ki dor jong ki marbam ki long kumjuh hi bad peit sa ka East Jaintia ka la don shibun ki Cement plant hynrei dang kham remdor ka cement hapoh ka Jylla ban shabar ka Jylla bad tang katno ngut ki trai Jylla kiba ioh kam ha ki Cement plant na ka 80% ka Agreement, ki paidbah ki dei ban pyrkhat shwa tang na kine, ka jingwan ka lynti rel kam dei ban pynmyntoi ia ki paidbah ka Jylla hynrei kadei ka plan ba sha lyndet ka ban pynmyntoi bad pynhun tang ia uwei arngut. Na ka liang jong ka FKJGP-EJH ka kwah ban ai jingmut sha ka sorkar jylla kata, ban klet shwa ia ka lynti rel bad pynbha shwa ia ki surok lynti syngkieng kiba la don lypa bad kiba la jot rathai shaba palat namar ba halor kitei ki mat ruh ka seng kala dep pynsngew da ki phew sien lyngba ki jingthoh bapher bapher hynrei bunsien ka sorkar kam ju sngap bad ki bor district kim ju shimkhia.
Ka jingpyrshah hi jong ka FKJGP-EJH ia ka lynti rel kadei halor ka nongrim ba ka Jylla jong ngi kam pat don ia ki aiñ ba biang bad ba skhem ban iada ia ka jaitbynriew jong ngi bad lada wan kane ka lynti rel kan buh jingma ia ka ri bad ka jaitbynriew jong ngi lyngba ka jing shah thyllep ha ki heh paid bad halor katei ka nongrim katba ym pat don ki aiñ ban iada iangi ki khianpaid hynniewtrep ngim pat lah ban pdiang ia ka Railway Project hapoh ka bri u Hynniewtrep baroh kawei , u kyrwoh ba shai sha ka Sorkar MDA-II hapoh ka jingialam u Conrad K Sangma kum u CM pyntreikam shwa ia ka ILP bad hadien kata kan sa pyrkhat ia ka lynti rel bad lada ka sorkar ka leh da ka bor bad lada jia eiei ka sorkar ka hap hi ban bahkhlieh pynkut ka Kyrwoh na ka FKJGP-EJH.
