Shillong, Naitung, 04: Ka Hynñiewtrep Integrated Territorial Organization (HITO) Mawryngkneng Circle ka la pynpaw ïa ka jingpyrshah halor ka jingthmu jong ka Sorkar ban pynkynriah ïa ka Marten ha ka shnong Nonghali, East Khasi Hills District,
Ka seng lyngba u kyrwoh na u Vice President ka HITO Sengkmie Bah Shaniah Nongrum bad u President ka HITO Mawryngkneng Circle Garry S. Marboh ka la ong, ‘lada ka Sorkar ka lah ban pynshisha ba ka jingwanrah ïa ka Marten ha Nonghali kam don jingktah katkum ki kyndon Environmental Laws ka seng kan pdiang hynrei lada ki ïaid lait katkum ki kyndon, ka seng kan nym shong kli kti.’
“Ngi pdiang ïa ka roi ka par hynrei lada kata ka roi ka par kan ktah pat ïa ki nongshong shnong bad khamtam ïa ka Wah Umkhen ngim lah ban pdiang. Kum ka seng ngi pynpaw ïa ka jingpyrshah ïa ka jingthmu ka Sorkar lyngba ka tnad Urban Affairs ban pynkynriah ïa ka Marten ha ka shnong Nonghali. Ka seng ka dawa, haba ka sorkar ka kwah ban leh ïa kaba donkam ka dei ban da twad jingmut shwa khnang ba kan nym jia kano kano hadien,” la ong u kyrwoh.
Ka seng ka la pynpaw ba ka kyrshan ïa ka jingïalang paidbah ka ban long ha ka 6 tarik mynta u bnai bad lada jingïalang kan long katkum ka rai bad ka sur jong u paidbah lada ha kano kano ka sur ka ba u paidbah u rai.
Ka seng ka kyntu ruh ïa ka Sorkar ba kam dei ban bamja khluit namarba kane ka jaka kaba ka la thmu ban buh ïa ka Marten ka don markhap bad ki jaka rep bad ka don ha syndah jong ka Wah Umkhen bad kan ktah ruh ïa ki dohum dohwah kiba im ha ha ka wah.
