Shillong, Nailur 01 : Ka Hynñiewtrep National Liberation Council (HNLC) ha ka sngi Thohdieng ka la pynpaw ïa ka jingsngew khia bad pyrshah halor ka jingthmu jong ka Sorkar BJP ban pynlong ïa ka ri India, “Kawei ka Ri, kawei ka Election” (One Nation, One Election) da kaba ong, ba kane ka dei tang ka buit poh bad ka atiar ban pynkhlaiñ ïa ka jinghikai bad nongrim Hindutva ban pynlong ïa ka ri India kum ka ri ka ban don tang kawei ka niam Hindu.“
Ka jingtyrwa jong ka BJP ban pynlong ïa ka ri India, “One Nation, One Election,” la donkam ban iathir sani halor kine ki buit poh ba shalyndet jong kane ka seng saiñpyrthei.
Ka HNLC ka sngew ba kane ka jingthmu ka dei ban pynkylla ïa ka ri India na kata ka ri synshar paidbah kaba laitluid sha kata ka ri synshar ki blei ka ban aibor ïa kita ki jinghikai ne saiñpyrkhat Hindutva bad ban seng nongrim ïa ka Hindu Rastra,” ong u General Secretary-cum-Publicity ka HNLC u Bah Sainkupar Nongtraw ha u kyrwoh ba la phah sha ki lad pathai khubor.
“Ki jingpyrshang ban wanrah ïa ka rukom treikam ban phai khmat tang sha kawei ka nongrim, da kaba leh bym suidniew ïa ka nongrim ka jingdon jong kiwei pat ki jait niam ne ban long ki bym ïashah ïa kano kano ka niam ha ka jingsynshar Sorkar. Kane ka jingsngew ka pynmih ïa ki jingkylli ha kaba ïadei bad ki ‘Fundamental Values’ kiba pynkhlaiñ ïa ka riti synshar paidbah ka Ri bad ka jingïada ïa ki hok jong ki jaidbynriew rit paid,” la ong ka Seng.
“Hynrei dei ban kynmaw kawei ba ka ri India ka dei ka ri ba ïasoh lang da kiba bun ki Jylla ne ki hima kumba la kdew ha ka Article 1 jong ka Riti Synshar ka ri bad kaba ïasyriem ruh kumba long ka United States. Ka India ka kynthup ïa kiba bun ki jylla bad ki it ki Hima kiba pynïasoh sha ka bad don ruh kiba la shu shah pynïasoh jubor.
Kumta kane ka jingthoh ka long halor ka nongrim ban wanrah ka jingpynshai halor ki jingsngew diaw jong kiba bun ki seng saiñpyrthei, ki sengbhalang, ki riewshimet namarba kane ka jingthmu khlempep kan ktah ïa ka jingsynshar paidbah jong ka ri,” la ong u kyrwoh na u Bah Nongtraw.
“Kane ka jingtyrwa ka la pynlong ïa kiba bun ban sngewkhia namarba kan ktah jur ïa ka synshar khadar jong ka ri. Kiba bun ki pynpaw ba kane ka jingthmu ka long ban bat ïa ka bor tang nalor, ban pynduna ïa ki nongmihkhmat bad ban pyntlot bor ïa ki seng riewlum ne seng trai ri ba kin ym donbor shuh ban dang ïasaid ha ki ïingdorbar khamtam ban khñiot ïa ka sur jong ki rit paid. Kane, suki-pa-suki kan ktah ïa ka jingïoh ïashim bynta ne jingïaryngkat ki nongmihkhmat na ki jaidbynriew bapher bapher kiba don ha ka ri. Ki khrawpyrkhat bad ki riewsaid aiñ ki pynpaw ba ka ri kaba ïaid bad bun ki jaidbynriew kum ka India ka donkam ban phiah ïa ka jingsynshar khnang ban ïoh ïadon bynta ryngkat lang da baroh ki jaid niam bad ki jaidbynriew bapher bapher,” la bynrap u kyrwoh na ka HNLC.
“Ka HNLC ka sngew ba kane ka buit ban wanrah ïa, ‘Kawei ka Ri, Kawei ka Election” ka long kum ki shaka kali ban pyntyllun bad pynurlong ïa kata ka saiñpyrkhat Hindutva kaba thmu ban pynlong ïa ka ri India kum ka ri kaba don tang kawei ka niam Hindu. Namar ka jingthmu ka long suki suki ban pynkhlaiñ ïa kane ka buit poh ban pynduh pyndam ïa ka jinglong laitluid ka India ha kaba ngeit ha kano kano ka niam ne ka jingsynshar ba laitluid khlem da ñiew ïa kano kano ka niam. Kane ka la pynlong ïa kiba bun ban buh ka jingkylli halor ki hok longtrai jong ka jingsynshar paidbah ka ri bad ka jingïada ïa ki rit paid,” ong shuh shuh u kyrwoh.
