Shillong, Nailur, 01: Ka Executive Committee jong ka Khasi Hills Autonomous District Council ha ka sngi thohdieng ka la maham da kaba tyngeh ïa u Self Styled Rangbah Shnong jong ka Them Rynjah ba la ju tip mynshwa kum ka Refugee & Rehabilitation Colony kaba dang hap hapoh u pud u sam treikam jong ka Dorbar Shnong Rynjah, ba um bit shuh nangne shakhmat ban dang ishu ïa ka No Objection Certificate sha ki briew ki bym dei ki Khasi kiba sah ha Rynjah ban ïoh ïa ka Trading License bad ka Labour License na ka ophis jong ka District Council bad wat ïa ka Election Photo Identity Card na ka Ophis ka Deputy Commissioner ka East Khasi Hills District.
Ha ka jingïakren bad ki lad pathai khubor, u Chief Executive Member (CEM) jong ka Khasi Hills Autonomous District Council (KHADC) u Bah Pynïaid Sing Syiem u la ong, “lada lap nangne shakhmat un sa bthah ïa u Secretary jong ka District Council ban mudui da ka ejahar sha ki Pulit.”
Ïa ka rai la shim hadien ba la soi ïa ka resolution da u EM in-charge Trade barim u Bah Sanbor Shullai, bad u MLA ka Pynthorumkhrah u Bah AL Hek bad u Headman jong ka Relief & Rehabilitation Colony u Ushanta Kumar Das ha u snem 2007. Kane ka kam ka la poi sha ka miej jong ka executive committee ba la ïalam mynta da ka NPP ha KHADC.
“Lada kata ka resolution ba la mynjur ha u snem 2007 ka pynkheiñ ïa ki riti ki dustur jong ka jaidbynriew ritpaid, ngin sa leh da kaba tyngeh. Ngan sa bthah ïa u Secretary jong ka Council ban ujor da ka ejahar pyrshah ïa u self-styled Rangbah Shnong halor ka jingai NoC na ka bynta ka trading license, ka labour license ne kino kino ki kot ki sla ne wat na ka bynta ban ïoh ïa ka EPIC. Kaei ka ban jia lada ki briew kiba nabar ki ïoh ïa ka EPIC bad ki ïoh ïa ka hok ban thep vote hangne. Kane kan knieh noh ïa ka hok jong ngi. Namarkata, ngin hap ban leh da kaba tyngeh halor kane ka kam,” la ong u Bah Pynïaid.
