Shillong, Nohprah 21 : Ka Khasi Students’ Union ba la lamkhmat da u President, Samla Lambokstarwell Marngar, Reuben Najiar (Asst. General Secretary) bad Manly Nongpluh (Finance Secretary) ha ka janmiet jong 21 tarik u Nohprah 2023, ka la leit kynduh kyrkieh ia i Kong Ampareen Lyngdoh, Cabinet Minister i/c Health Department, Government of Meghalaya halor ka thung kam thung jam ha NEIGRIHMS kaba la mih bun tylli ki jingkynrum kynram.
Kat kum ka jinglum jingtip jong ka Seng, ka shem ba na bynta ka post jong Record clerk, kumba 15 tylli eiei ki jingkylli ki dei ha ka ktien Hindi bad kane hi ka long kaba pynduh nong ia ki samla Khasi ba la pynkhreh bad thoh ia ka eksamin na bynta kane ka post. Kane ka rukom buh jingkylli ka la iaid lait na ki kyndon ba la buh da ka eksamin kaba dei ban long ha ka ktien phareng (English). Shuh shuh ka Seng ka la ioh khubor ruh ba ki bor pyniaid jong ka NEIGHRIMS ki kwah ban pynmih noh mardor ïa ka result jong ka eksamin watla ym pat lah ban pynshisha ia ki kot ki sla jong ki nongïaleh ïaka eksamin bad wat hapdeng kiba bun kine ki kynrum kynram. Kane ka jingleh jong ki bor pyniaid ka NEIGRIHMS ka pynartatien ia ka Seng ba ioh lehse ka don eiei sha lyndet.
Ka Seng ha ka dorkhas jong ka, ka la pynpaw ruh ia ka jinglynngoh halor ka eksamin jong ki Nursing Officer ba la pynlong lyngba ka NORCET -5 examination ba ladep ha kine ki khyndiat bnai, ha kaba ki don 194 tylli ki post na bynta ki nurse bad na kine 175 tylli ki post ki la leit sha ki shynrang kiba wan na kiwei pat ki jylla bad tang 17 ngut ki kynthei. Kumba ju long hi ha kiwei kiwei ki medical institute ka ratio jong ki kynthei bad shynrang ka dei 80:20 hynrei yn da phai pat sha NEIGRIHMS ka kylla khongpong bad kine kiba laioh ia ka kam, kim shym la don ia kano kano ka experience (practical) namar ba ka NEIGRIHMS kam sym pan ia kata bad kane kan buh jingeh ia ki nongshah sumar kiba wan ban sumar ia lade ha katei ka jaka.
Ka Seng ka iai ban biang ruh halor ka Grade B bad C post ba la pynlong da ka agency ba nabar ba tip kyrteng ia ka kum ka HLL, ba bun na ki samla Khasi ki ngat ban thoh eksam sha Guwahati, Jorhat, Dibrugarh bad Delhi. Kane ka la buh jingeh shibun bah ia ki samla kiba duna ia ka jingioh jingkot bad ka Seng ka lap ruh ba bun na ki samla Khasi kim shym la lah ban leit thoh ia ka eksamin jong ki.
Ka Seng ka buh jingkylli ba balei ba ka NEIGRIHMS kam lah ban pynlong hi ia ka eksamin kam bad ka hap ai sha ka agency kum ka HLL bad ka NORCET bad lyngba kine ngi iohi ba bun tang ki briew na kiwei pat ki jylla kiba ioh kam, lehse ka lah ruh ban long ba ki bor pyniaid kiba ha khmat jong ka NEIGHRIMS ki kwah ban pynrung ia ki briew na ki jylla ki jong ki.
Ka Seng ka kyntu ia ka Sorkar jylla ba kan khmih bad bishar bha halor kane ka bynta bad kyntu ba nangne shakhmat ka NEIGHRIMS ka dei ban pynlong hi ia ka eksamin bad ym dei ban shu ai pateng ha kiwei pat.
Na ka liang jong i Dr. Ampareen Lyngdoh i la kular ban shim khia halor kine ki mat ba ktah ia ki samla wad kam wad jam jong ka jylla.
