DAWA BAN PYNTREIKAM NOH ÏA KA (PIT- NDPS) ACT 1988
Shillong, Nailur 11: KaNorth East Indigenous Peoples’ Forum (NEPIF), Shillong Chapter ba kynthup ia ka seng FKJGP, RBYF bad HNYF, kaba la shong jingialang ha ka 9 tarik mynta u bnai ka la rai ban pynpaw ia ka jingpyrshah kaba jur ia ka jingthmu jong ka Sorkar National Democratic Alliance (NDA) ban pynkylla kyrteng noh ia ka ‘INDIA’ sha ka ‘BHARAT’.
Ha u kyrwoh ba la phah sha ki lad pathai khubor lyngba u Nongaiktien ka NEIPF, u Bah Dundee C Khongsit, ka Forum ka sngew ba ka kyntien ‘Bharat’ ka dei kaba mih na ka Sanskrit bad ka dei kaba don jingiasnoh bad ka niam Hindu. Ka sngew ba kane ka jingthmu ka dei tang ka buit ban tyllep ia kiwei pat ki niam kiba don ha kane ka Ri. Ka Ri India ka dei ka ri kaba iakhleh bun ki Jaidbynriew bad bun tylli ki Niam bad ngi ngeit ba ka jingpynkylla ia ka India sha ka Bharat kan sa ktah jur ia kane ka jinglong ba kyrpang jong ka Ri India.
Ha kane ka jingialang, ka Forum ka la rai ruh ban pyrshah jur halor ka jingpyntreikam ia ka Uniform Civil Code (UCC) hapoh ka Jylla bad ka thain Shatei Lam Mihngi ka Ri bad ka don jingsngew ba kane ka sienjam jong ka Sorkar Pdeng kan sa ktah jur ia ki rit paid bad ki riewlum ha ka kolshor, ka jinglong tynrai, ka riam ka beit bad kiwei kiwei, ha kaba ka por kan sa poi ba kin ym sngew trai shuh iala ka jong ka Ri.
Halor ka jingjyllei jong u drok, ka NEIPF, ka la iatai sani bha bad ka la rai ban dawa ia ka Sorkar Jylla ba kan pyntreikam noh ia ka Prevention of Illicit Traffic in Narcotic Drugs and Psychotropic Substances, (PIT- NDPS) Act 1988 ha ka jylla ban rat dyngkhong ia une jingdih pynbuaid uba pynjot ia ki samla, ki iing ki sem bad ka imlang sahlang.
“Ngi la sakhi ia ka jingkiew ki kam sniew khamtam ki kam tuh kam thiem ha manla ki shnong ki thaw. Ki kam tuh kila jia manla ka sngi ha manla ki shnong haduh ba ki paidbah kila hap thiah siar ialade ha ka miet ka iong. Ka daw hi ka dei namar ba bun ki nongtuh ban ioh thied droks. Ka por kan sa poi ba lada kim ioh tuh shuh da kaba suk, kin sa poi sha u pud ban rah da ki tiar bad rung jubor sha ki thliew Iing. Kaba sheptieng eh ka long ba suki suki, kane ka kam droks ka lah ban pynkha ia ki kynhun nongkhaii kiban sa pyndonkam da ki kor ki bor ka juk ban lah pyniaid iew ia u droks,” ong u kyrwoh.
Ka NEIPF ka dawa ruh ban pynkha noh da ka tnad ba pura jong ka Anti Narcitics Task Force (ANTF) kumba long ka SB, CID ha Jylla, ka ban khlieh da u Heh Ophisar ba bat ia ka kyrdan Inspector General (IG) ka ban peit thik tang ia ki kam khaii drok ha ka Jylla.
“Ka Jylla ka la don ia ki Anti Narcotics Task Force (ANTF) ha manla ki District ka Jylla bad ia kine ki kynhun la khlieh da ki Superintendent of Police (SP), kiba iakhun ia u drok ha la ki jong ki jong ki District hynrei ka Jylla ka la donkam da ka tnad ba pura jong ka ANTF ka ban pyniaid na Headquarter ka tnad Meghalaya Police,” la bynrap u kyrwoh.
