U General Secretary ka UFBU u Rupam Roy u la ong ba ka Forum, ‘ka kyntait mardor ïa ka jingthmu ban aiti noh sha ki riewshimet,” da kaba pynpaw ba ki Public Sector Bank (PSB) ha India ki la long u budlum ha ka jingpyntyllun ïa ka pisa, ka jingkyrshan ïa ki kam pynroi sha ki shnong nongkyndong, bad ka jingskhem ka ïoh ka kot. Ka jingithuh ïa ki Bank ha ka ri ha u snem 1969 ka la pynkylla dur ïa ka ïoh ka kot jong ka ri India da kaba ai ram sha ki nongrep, ki nongtreikam lajong, ki kynthei, ki jaidbynriew ba kham tlot bor, bad ki nongshong shnong ha ki nongkyndong, ïa kiba ki Bank shimet kin ym lah da lei lei ruh em ban ai jingshakri bad kin ym leh hi ruh kumta,” u la ong.
Shillong, Naiwieng, 06: Ka United Forum of Bank Unions (UFBU), kaba mihkhmat ïa ki khyndai tylli ki seng jong ki ophisar bad ki nongtrei ha kylleng ki Bank, ka la pyrshah jur ïa ka jingkren jong ka Myntri ka tnat Pla Tyngka ka Sorkar Pdeng ka Nirmala Sitharaman ha Delhi School of Economics kaba la long ha ka 4 tarik, mynta u bnai ha kaba la pyni ba ka Sorkar ka thmu ban aiti noh sha ki riewshimet ïa ki Bank.
Ka Forum ka la maham ba ka jingaiti ïa ki Bank ban pynïaid da ki riewshimet kan pyntyllun shadien ïa ka jingïaid shaphrang jong ki Bank. “Ki Private Bank ki ai ram ha kaba ka jingïohnong ka heh, ki khang noh ïa ki tnad bym lah ban ïohnong, bad ki iehnoh ïa ki bynta kiba kham tlot. Ki prokram ba kongsan jong ka ri kum ka Jan Dhan Yojana, DBT Transfer, ki penshon bad ka jingsiew MGNREGA la pyntreikam jan baroh lyngba ki PSB,” ong ka UFBU.
Haba pynpaw ïa ki jingthut jong ki Private Bank kiba la dep kum ka YES Bank, ka Global Trust Bank bad ka Lakshmi Vilas Bank, ka UFBU ka la ong ba dei ka tnat treikam paidbah kaba la pyllait im ïa ki nongthep pisa manla ka por. “Ha ka rukom synshar kaba pura, mano ban ïada ïa ki paidbah?, la buh jingkylli ka UFBU.
Ka Forum ka la banjur ba ki PSB ki ai jubab sha ka Parliament, ka CAG bad ki paidbah ym kum ki Bank shimet kiba jubab tang ha ki nongshim bynta.
“Ka jingaiti ban pynïaid da ki riewshimet kan ym wanrah ïa ka rukom treikam kaba tbit,” la ong u Roy. “Ïa ka jingtreikam kaba paka lah ban ïohi lyngba ki jingpynkylla ha ka rukom treikam, ka teknoloji, bad ka jingkitkhlieh ym da kaba aiti ïa ka pisa paidbah sha ki jingmyntoi shimet.”
Ka UFBU ka la dawa ïa ka jingkular na ka Sorkar India ban pynthikna ban ym aiti ïa ki Bank Sorkar sha ki riewshimet, bad ka la kyntu ruh ïa ka Sorkar ban pynkhlaiñ shuh shuh ïa ki PSB lyngba ka jingkyrshan na baroh ki liang bad ban pynthymmai shuh shuh ïa ki jingtreikam.
“Ki Public Sector Bank kim dei tang ki shlem khaii, ki dei ki atiar jong ka jingbishar hok ha ka imlang sahlang bad ka jingkiew shaphrang jong ka ri,” la ong u Roy.
“Ngi ieng ryngkat bad ki paidbah jong ka ri India ban ai jingïada ïa kine ki nongkynti jong ka ri. Ngin ym ailad ba yn die duh ïa ki.”
