Shillong, Nohprah, 10: Ka Voice of the People Party (VPP) ka pyrshah jur ïa ki sien jam ba la shim da ka Sorkar Meghalaya Democratic Alliance (MDA) ban ai ei ïa ka jaka kaba heh haduh 1.4 akar hapdeng ka sor Shillong nalor ka jaka ba la don lypa kaba heh haduh 2.4 akar ban pynsah ïa ki briew na Them Ïew Mawlong ha kaba bun na kine ki dei lypa kiba sah beaiñ ha ka jaka sorkar.
“Ka VPP kam don jingujor eiei lada ka Sorkar ka ai jaka sah ïa ki nongtrei Sorkar kiba dei hok ban sah ha ki ingsah jong ka Sorkar katba ki dang trei ha ka kam hynrei ka jingai jaka sha kine ki briew paidbah ka long kaba ym lah ban peiphang bad ka long ruh shabar na u pud jong ka aiñ nalorkata kam shym la don ka jingpynshai kaba tikna na ka liang jong ka Sorkar ha kano ka rukom ka lah ban shu ai kumne,” ong u kyrwoh ka VPP ba la phah da u dkhot ka Media Cell kaVPP u Dr Rusievan Shangpliang.
“Lah ban kdew hangne ba ka Sorkar Jylla ha ki por ba la leit ka la dep rai ban ym ai ïa kino kino ki jaka sorkar sha ki riew shimet. Hynrei mynta ka kynti pat ka jingshim jong ka sorkar ïa kane ka rai kaba long da khongpong ïa kaei kaba ka la dep rai teng,” u la ong.
“Ai ba ka sorkar MDA kan pyni nuksa hangno ba ka la ju ai ïa ki jaka sorkar sha ki briew jong ka jylla kiba duk bad ki bym don jaka puta bad kiba donkam ban ïoh la ka jaka sah. Hato ka sorkar ha ki por ba la dep ka la ju ai jaka ne ingsah sorkar sha ki khun ki kti ne ki bahaïing hasem jong ki nongtrei sorkar? Ki paidbah jong ka jylla ki kwah ïa ka jingpynshai kaba shong nongrim halor kane ka jingleh palat pud na ka sorkar,” la bynrap u Dr. Shangpliang.
