Shillong, Nohprah, 10: Ka Shillong College Central Library ha ryngkat ka jingïatreilang bad ka Internal Quality Assurance Cell (IQAC), Shillong College ka la pynkut noh ïa ka Library Orientation Programme kaba san sngi halor ka phang, “Beyond Books: Unveiling the Digital Realm” kaba la sdang naduh ka 4 tarik bad pynkut noh ha ka 8 tarik mynta u bnai.
Ka thong jong kane ka orientation programme ka long ban pynkupbor ïa ki samla pule ba kin sngewthuh kham bniah kumno ban tih ïa ki tyllong jingtip da kaba pyndonkam ïa ka Digital.
U Co-ordinator, ka IQAC Dr. Sharma, haba ai jingkren ha kane ka sngi u la pynkynmaw ïa ki lynti ïaid kiba jwat jong ka Library ha ka College. U la banjur ruh ïa ki bynta bakongsan jong ki Library, wat hapdeng ka jingkiew irat jong ki tyllong jingtip na ka Digital. U la kyntu ïa ki samla pule ba kin pynlong ïa ki Library kum tang ki jaka buh kot, hynrei ban shim kum ka jingpynïar ïa ki jingtip kyllum Digital kiba long shabar na ki par jingtip.
Ka Principal jong ka College ka Dr. (Mrs.) Evakorlang Kharkongor ka la ai mynsiem ïa ki samla pule ba kin shim ïa ka Library kum ka saw kynroh kaba pynroi bad pynproh ïa ki par jingtip kiba bun. Ka Dr. Kharkongor ka la pyntip ruh ïa ki jingkylla ka jingtreikam jong ka Library.
Ka la ïaiban ïa ka bynta ba kongsan jong ka Library ha kaba pynbeit ïa kiba bun ki kot pule da ka jingwan jong ka National Education Policy (NEP), ka la pynshlur ïa ki smala pule ba kin shim kabu na ki kot kiba don hapoh kane ka Libraty. Ka la kular ba ka Shillong College kan ïai bteng ban kyntiew ïa ka Library da ki teknoloji kiba thymmai, khnang ba kan long ka shlem pule kaba pynsngewtynnat ïa baroh.
Ka Mrs. B. Lyngdoh, kaba long ka Librarian bad Resource Person ka la ong ba ka Library ka dei kaba la buh khnang na ka bynta ki samla pule ba kin ïoh ïa ki kot kiba donkam ha kaba ki don da ki phew hajar tylli ki e-resources ba la thied da ka College bad ka Open Educational Resources kaba lah ban ïoh ha ka rynsan Online.
