Shillong, Rymphang 13: Ki samla pule 4th Semester ka St. Anthony’s College, Shillong ha ka sngi Baar ki la ieng pyrshah ia ka hukum ba la pynmih da ki bor pyniaid jong ka College ban phong da ki Uniform haba ki wan klas naduh mynta u snem.
Ia ki samla pule jong ka Kolej ba la synran da ki nongïalam jong ka NEHU Students Union (NEHUSU), ha ka jingiakynduh ia u Principal jong ka College u Br. (Dr) Albert Dkhar ki la pynsngew ïa ka jingeh jong ki samla pule na ka jingpynmih hukum da ka College.
Ka St. Anthony’s College Shillong ka la pynmih ia kane ka hukum ha ka 29 tarik Naiwieng, 2023 da kaba bthah ïa baroh ki samla pule ba kin phong noh da ki Uniform haba wan sha klas naduh mynta u snem 2024.
Kum ban shu pynkynmaw, ki samla pule 4th Semester ki la pynlong da ka Signature Campaign ban pynpaw ïa ka jingpyrshah halor kane ka hukum ba la pynmih da ki bor pynïaid jong ka College bad pyntip ba haduh 400 ngut ki samla pule ki la ai jingkyrshan ïa kane ka jingdawa.
Ha ka jingïakren bad ki lad pathai khubor, u samla Arman Malngiang ula ïathuh ba ki samla pule ki la dawa ïa u Principal ba dei ban pyllait noh ïa ki samla pule 4th Semester na ka hukum phong Uniform haba wan klas.
“Ngi don satang shi Semester ban pyndep ïa ka jingpule bad ki Uniform ki dei kiba shongdor T. 5000 tam. Ki hap ban pyrkhat lem ïa ngi kiba wan College sa tang shisnem,” la ong u samla Malngiang haba pyntip ba ka jingshim klas ïa ki 4th Semester kan sdang ha ka taïew ban wan bad baroh ki samla pule ka Semester ki la rai ban ym phong satia ïa ki Uniform haba wan klas.
U ïathuh ba ïa kane ka rai, ki samla pule ruh la pyntip sha u Principal khnang ba un ym shim ïa kano kano ka lynti ban pynshitom ïa ki samla pule.
U la ïathuh ba u Principal um sym la ai satia ïa kano kano ka jingkular halor kine ki jingdawa bad pyntip ba un sa rah ban ïakren ïa kane ka jingpynsngew jong ki samla pule sha ki bor bahalor.
“Ha ki snem ban sa wan, ki bor pyniaid ka College ki dei ban da thoh shai ha ki Prospectus bad ha ki Form ba ka long kaba donkam ba ki samla pule kin hap ban phong ïa ki Uniform haba ki kwah ban pule hapoh kane ka College,” u la ong.
