Shillong, Naitung, 06: Ka Na Rympei FC ka la long ka kynhun ban ïohrah ïa ka nam lahduh ha ka 1st Hynñiewtrep U-16 Football League ba la pynlong da ka Hynñiewtrep Youths’ Council (HYC) Central Body Sports Cell daba pynliem noh ïa ka Tanaw FC lyngba ka jingïashut tie-breaker.
Ka jingïalehkai hapdeng kine ki ar kynhun ka la long kaba shongshit bad kaba itynnad. Ha ka jingïakhun ha ka kylla step ka Tanaw FC ka la ïoh ban pynkhih nyngkong ïa ka jar. Ynda la poi ka jingïakhun ha ka kylla miet bad shwa ban kut ka por sa tang ar minit ka Na Rympei FC ka la lah ban pynïakhaid da kaba ïoh pynkhih ïa ka jar.
U Referee uba la rai ban pynïakhun da ka Extra Time hynrei kine ki ar kynhun kim shym la lah satia ban ïoh pynkhih ïa ka jar bad ka jingïakhun ka la shu kut noh da ka jingïashut tie breaker ban rai ïa ka jingjop bad ka jingrem.
Ha kane ka sngi, u President Rangbah ka HYC Bah Roykupar Synrem u la long kum ku Kongsan katba u Vice President Bah Donboklang Kharlyngdoh u la long kum u Symbud Kongsan.
Ka HYC ka la pynkup burom ruh ïa ki arngut ki samla ka jylla, kata, ïa u samla Niawki Ïakai uba lah wanrah burom ïa ka jylla ha kaba u la ïoh ban long u National Refferee jong ka Wushu bad kum u Coach jong ka Jylla ha ka Wushu bad kynthup ruh ïa u samla Banteilang Jyrwa uba la wanrah burom ïa ka jylla kum u Champion Motor Cross Rider jong ka i.
Ïa ka khusnam la sam da u President bad u Vice President jong ka seng. Ïa ka khusnam Best goalkeeper la rah da u samla Wallamjingsuk Khongshun na ka Na Rympei FC, Best Player la ïoh da u samla Frezio Majaw na ka Tanaw FC bad ïa ka nam top scorer la ïoh da u samla Bankit Mujai na ka Nangïaikiew FC.
