Shillong, Naitung, 04: Ka jingiakop rwai “Sur Kynud Niam, Season -2” ba la pynlong da ka DBMNTV ka la poi sha ka bakut da ka Grand Finale ha ka janmiet 3 tarik Naitung, ha Don Bosco Youth Centre Laitumkhrah ha kaba la shim bynta da ki 10 ngut ki heprit, ki samla lud bad samla rangbah kiba la shah jied ban rung Final na ki 47 ngut kiba la shah jied ha ka Blind Audition bad ba la wan ban iakhun ha kane ka jingiakop rwai Sur Kynud Niam, Season-2, ka Rynsan iakop Rwai Sur Niam ha ka Ktien Khasi.
Na ki 10 ngut ki nongiakhun ha kane ka janmiet, u Samla Kit Kupar Nongsiej u la wan banyngkong bad u la ioh ia ka khusnam bad ka buskit 35 hajar tyngka. U samla Franky Nongbri u la wan ba-ar bad ioh ia ka khusnam bad buskit 15 hajar tyngka bad ka Tia Vanezza Kurbah ka la rah ia ka nam ba-lai ryngkat ka khusnam bad ka buskit 5 hajar tyngka.
U Bah Ronnie Wahlang, MCS, Additional Deputy Commissioner, East Khasi Hills, u la long u kongsan ban sam bad pynkhamti ia ki khusnam bad buskit sha baroh ki nongiashim bynta bad ha ki nongjop ha kane ka jingiakop final, Sur Kynud Niam, Season-2.
Ha ka jingkren lyngkot ha kane ka janmiet, u Bah Ronnie Wahlang, u la iaroh ia ki sap ki phong bakynsai ba kine ki 10 ngut ki nongrwai ki la sei hakhmat ki kmie ki kpa bad ki paidbah ha ka lympung ia kop rwai. U la kyntu bad ai mynsiem shuh shuh ia ki samla ban tur shakhmat ban pynroi bad pynjanai ia ki sap ki phong jong ki. U la iaroh kyrpang eh ia ki kmie ki kpa kiba la theh la ka buit ka bor ban kyrshan bad ban pynshlur ia ki khun ban pynpaw pyrthei ia ki sap jong ki.
Khlem da tyngkai ia ki kyntien, u Bah Ronnie u la ther da ki ktien jali jaum ia ki matti bajanai jong u Rev Fr Michael Makri, Director, Don Bosco Youth Centre bad u managing director ka dbmntv uba la pynlut ia ka bor met bad bor jabieng ban kyntiew ia ki sap jong ki samla ha baroh ki liang. U la iaroh ia ka bort rei shitom jong Rev Phadar Makri uba la kyntiew ia ka Don Bosco Youth Centre sha ka kyrdan International Standard na ka bynta ka jingmyntoi ki samla jong ka Meghalaya.
U Rev Phadar Michael Makri u la ai ka jingkhublei sngewnguh ia baroh kiba la don bynta bad snoh kti ha kane ka lympung kaba la poi sha ka Grand Finale kaba shongkun mynta ka janmiet. U la ai ka jingngewnguh bakyrpang ia ki nongialam ka seng Salesian jong ka Shillong Province kiba la kyrshan borbah man la ka por ia ki jingleh jingkam baroh ba ka Youth Centre ka pyntrei kam ban kyntiew ia ki samla ka jylla baroh kawei. U la ong ruh ba ka jingthmu jongki ba ki pynlong ia kum kitei ki jingiakop ka long ban khring ia ki samla ban pyndonkam ia ki sap jongki ha ki kam ba iohjingmyntoi bad ban lait na ki jingsniew kiba la shyrkhei ha ka imlang sahlang namar ban pynbun ia ki jingriaw niam ha ki rynsan social media bad ban ai ka rynsan ia ki khynnah bad ki samla ki ba don sap ban mih sha khmat.
