Shillong, Naitung, 10: Ka Sorkar Jylla sngi Balang ka la rai ban khang khyrdep noh ïa ka Meghalaya State Housing Board (MSHB) bad ban pynlut pisa haduh T. 7.42 klur na ka bynta ban siew ïa ka Voluntary Retirement Scheme (VRS) sha ki 18 ngut ki nongtrei jong ka Board.
U Myntri Rangbah ka Jylla u Conrad K. Sangma, ha ka jingïakren bad ki lad pathai khubor, u la ong, “kumba phi tip ba kane ka dei ka kam kaba la sah pongding la slem bha bad bun na ki nongtrei ha ka Housing Board ki la kyrpad ban leh kham kloi ïa kane. Namarkata, la wanrah ïa kane ka mat ïatai mynta ka sngi bad ka kynhun Myntri ka la mynjur ïa ka jingtyrwa ban khang khyrdep noh ïa ka MSHB bad ban siew ïa ka VRS sha ki 18 ngut ki nongtrei jong ka Board.”
Katkum ka jingïathuh jong u Myntri Rangbah ka jinglut pisa ban siew ïa ka VRR sha ki nongtrei kan kot kumba T.7.42 klur.
Haba kylli kaei ka daw ba ka Sorkar ka la shim ïa kane ka rai, u Myntri Rangbah u la ong, “namarba kam da don shuh ka jingtreikam hapoh ka Housing Board kumba ka long mynta. Ka la dei ruh ka jingdawa kaba la slem bha. Ha ka jingshisha, la jan shiphew snem lada ngam bakla ha kaba ki don ruh ki khep ba ki nongtrei kim ïoh tulop thikna namarba ka dei ka Independent Board. Dei halor kine ki daw kaba la pynlong ïa ki nongtrei ba ki kwah ba ka Board kan khang khyrdep noh bad halor kata ka nongrim la shim ruh ïa kane ka rai.
“Ïa ka Housing Board la thaw da kaba shim ram na ka HUDCO bad na ka LIC bad kine ki long ha ki snem 1988-89 bad mynta la jan baroh ki tnat treikam bad kiwei kiwei ki riewshimet ruh ki lah ban thaw ïa ki lad ban ïoh ïa ka ram. Namarkata, ka jingtreikam jong kane ka Board kam don shuh,” u la ong.
Haba kylli, hato ka Sorkar kan shim kum kane kajuh ka sienjam ïa kiwei pat ki PSU kim bym treikam shuh ha ka jylla, u Myntri Rangbah u la ong, “haoid ngi hap ban shong bad ban ïathir ïatai bad ban khmih bniah. Haba ngi ïohi ba ki don ki jingtynjuh ba haba shwa ba ngin shim ïa ka rai ngi khot ïakren lang ïa ki kynhun sha ka jingïalang ban ïatai sani bha.”
