Shillong, Nailur, 30: Ka Sorkar Meghalaya bad ka Sorkar Assam ki la rai ban weng noh ia ki Pulit kiba ap pahara ha ki jaka ba don hapdeng ka jingiakajia pud ha shilynter jong ka Meghalaya bad ka Assam.
Ia kane ka rai la shim ha ka jingialang pynbeit pud ha ka wat kaba ar hapdeng u Myntri Rangbah ka Jylla Meghalaya u Conrad Kongkal Sangma bad u Myntri Rangbah ka Jylla Assam u Himanta Biswa Sarma kaba la long ha Khanapara, Guwahati ha ka sngi Saitjaiñ ryngkat ka jingdonlang jong ki nongmihkhmat na ki Regional Committee ba la khlieh da ki Myntri Sorkar ka Meghalaya bad Assam.
Ki arngut ki Myntri Rangbah ki la shim ia ka rai ban iapynbeit shwa ia ki 3 tylli ki jaka kiba don hapdeng ka jingiakajia pud napdeng ki 6 tylli. Nalor kata, u Conrad bad u Himanta ki la rai ruh ban ai por haduh ka 31 tarik Nohprah, 2023 ia ka Survey of India bad ia ki ophisar jong ka Jylla Meghalaya bad Assam ban pyndep ia ka jingithuh ban phiah ia u pud u sam ha ki 6 tylli ki jaka ia kajia pud ba ladep iapynbeit ha ka wat kaba nyngkong ia kaba ladep iasoi ia ka Memorandum of Understanding da ka Sorkar Meghalaya bad ka Sorkar Assam ha ka 29 tarik Lber, 2022 ha Delhi ba la sakhi lang da u Myntri ka tnat Kam Pohing ka Ri u Amit Shah.
Ha ka jingiakren bad ki lad pathai khubor, u Conrad K. Sangma u la iathuh ba ma u bad u Himanta kin sa leit sorjamin ia ka Khanduli-Psiar kaba hap hapoh ka thaiñ Block-I ha ka taiew basaw jong u bnai Risaw kata hadien ba la kut ka lehniam Puja.
Kane ka jingialang ka la rai ruh ban weng noh ia ki Pulit Meghalaya bad Pulit Assam na ki jaka ba don ka jingiakajia pud bad ban buh bujli da ki Pulit CRPF khnang ba kan ym don kano kano ka jingleh shilliang.
Ha kaba ïadei bad ka jingjia ha ka shnong Mukroh ha ka 24 tarik Naiwieng, 2022, ki arngut ki Myntri Rangbah ki la rai ban kyrpad ia ka Sorkar Pdeng ba kan phah tohkit da ka Central Bureau of Investigation (CBI) bad ban register ia ka Case ym ha Guwahati ne Shillong hynrei shabar jong kine ki ar tylli ki jaka khnang ba ka jingtohkit kan long ka bym leh shiliang.
U Himata, u la iathuh ba la rai ban pynkut noh ia ki Judicial Inquiry ba la thung da ka Sorkar Meghalaya bad ka Sorkar Assam.
“Ngi la shim ia kane ka rai hadien ba ki paidbah na ka Jylla Meghalaya kim shym la leit mih satia ban ai sakhi hakhmat ka Judicial Inquiry ba la thung da ka Sorkar Assam bad ki paidbah na Assam kim shym la leit mih satia ban ai sakhi hakhmat ka Judicial Inquiry ba la thung da ka Sorkar Meghalaya halor kane ka jingjia,” u la bynrap.
Ka jingïakren ha kane ka sngi ka la long kaba seisoh bad bthah ruh ïa ki Regional Committee ba ki dei ban shimkhia ban wanrah ïa ka jubab kaba hun hapdeng ki paidbah kiba shong basah ha khappud ka Meghalaya bad Assam.
Halor ka jingshah thombor jong ki Khasi-Pnar ha ka thaiñ Lapangap na ka liang ki arngut ki Myntri Rangbah ki la ong ba kin sa bthah ia u Deputy Commissioner jong ka West Jaiñtia Hills u Bah B.S. Sohliya bad ia ka Deputy Commissioner jong ka West Karbi Anglong ka Krishna Paul ba kin iapynbeit halor kane kam bad lada jia ba dang mih kano kano ka jingiakynad na ka liang jong ki Regional Committee kin sa shimkhia ban pynbeit ïa kane ka kam ban pyneh ïa ka shongsuk shongsaiñ khamtam ba ki Khasi-Pnar kin ioh ban kheit ïa ki mar rep bad ia u kba uba ki la thung.
