Shillong, Nailur 28: U Vice Chairman jong ka seng kieng atiar Hynñiewtrep National Liberation Council (HNLC) u Sufiyan A. Hazarika uba ju khot sin u Manbhalang Jyrwa ha ka sngi Palei u la phah ïa ka shithi iehnohkam, ba la pdiang da ka Central Executive Committee (CEC) ka HNLC.
Ha ka jaka jong u, ka HNLC ka la thung bujli da u Bah Teimiki Laloo, Vice Chairman ba thymmai jong ka HNLC.
Kane ka jingresaiñ jong u, ka la wan jia ha ka por ba ka jingïakren ïasuk ka dang ïaid shakhmat hapdeng ka HNLC ka Sorkar Pdeng bad ka Sorkar Jylla.
“Ngi sngewkmen ban pyntip ba u Sufiyan A. Hazarika, ba ju tip kum u Manbhalang Jyrwa, u la phah ïa ka shithi iehnohkam jong u, kaba ngi la pdiang halor ka jingsngew parabriew,” ong u General Secretary-cum-Publicity Secretary ka HNLC u Bah Saiñkupar Nongtraw ha u kyrwoh ba la phah sha ki lad pathai khubor.
“Kum ka jubab, ka CEC ka la thung bujli ïa u Teimiki Laloo kum u Vice Chairman ba thymmai na ka bynta hynriew bnai,” u la bynrap.
Da kaba pynpaw ba ka jingiehnohkam jong u Bah Jyrwa kan ym ktah lane pyntlot ïa ka bor jong ka seng, u Bah Nongtraw u la ong, “ki nongrim ba ïaineh jong ngi kin ïaineh khlem jingkylla, khlem da kheiñ ïa ka jingkylla ha ki nongïalam.”
“Ngi kyrmen ba ki paidbah Hynñiewtrep jong ngi kin ïai burom ïa u Bah Manbhalang Jyrwa kum parabriew,” u la ong.
Ka HNLC ka la kyntu ruh ïa ka Sorkar ban kiar na kaba pyndonkam bakla ïa u Bah Jyrwa watla u la iehnohkam hynrei ban buh hakhmat ïa ka jingïakren ïasuk.
“Shuh shuh, ngi kyrmen ba ka Sorkar kan kiar na kaba pyndonkam bakla ïa ka jingresaiñ jong u Bah Jyrwa hynrei ban buh hakhmat ïa ka jingïakren ïasuk. Ka jingiehnohkam jong u Bah Jyrwa kam dei ban pynthud ïa ka lynti jong ka jingïakren ïasuk,” ong u Bah Nongtraw.
U la bynrap ba ka kynhun kaba la bynshet ban pyntyllun shakhmat ïa ka jingïakren ïasuk yn sa ïalam da u Vice Chairman uba thymmai, u Bah Teimiki Laloo.
