Shillong, Nailar, 17: U Bah Gerald Shullai uba bat kum u Organising Secretary u la phah ïa ka shithi iehnohkam sha u President/Secretary jong ka UDP West Shillong Constituency ban pyntip ba u la iehnohkam na ka party.
“Katkum katei ka phang kaba la kdew haneng, nga pyntip sha phi ba naduh mynta ka sngi ka 17 tarik, Nailar, 2024 nga la iehnoh/weng noh ïa lade kum u Organising Secretary bad kumjuh ruh kum u Primary Member jong ka UDP 18-West Shillong Constituency . Ka jingwengnoh na ka kam kum u Organising Secretary bad kumjuh ruh kum u Primary Member jong ka seng UDP ka dei na ka bynta ka kam shimet ka jong nga,” la ong u Bah Gerald.
“Nga kyrpad ba phin pdiang ïa kane ka jingpyntip bad nga ai khublei kitbok kitwriang ïa phi bad ïa ka seng baroh kawei ba phin dang ïatrei shitrhem na ka bynta ka ri bad ka jait bynriew baroh kawei,” la ong u Bah Gerald Shullai ha ka shithi iehnoh kam.
