Shillong, Nailur, 08: Ka Khasi Hills Autonomous District Council (KHADC) ka la rai ban thaw da ka Operation Team kaba kynthup ïa ki dkhot ba palat 80 ngut ban pahara ha Ïewduh namar ka jingïoh ujor na ki nongshong ïew bad na ki nongthied nongpet ïa ka jingbym shngaiñ na ka jingdon jong ki nongdih drok kiba shong harud lynti wat ha ka por mynstep.
Ïa kane ka rai la shim ha ka jingïalang ba la khot pynlong da u Chief Executive Member (CEM) jong ka Khasi Hills Autonomous District Council (KHADC) u Bah Shemborlang Rynjah ha ka Lah Sngi u Blei ba la ïashim bynta da u Syiem ka Hima Mylliem u Pa’iem Ainam Manik Syiem lem bad ki Myntri, kynthup ruh u Officer Incharge jong ka Cantonment Beat House bad ki Pulit ka tnat Enforcement jong ka Council.
Ha ka jingïakren bad ki lad pathai khubor u EM ka KHADC u Bah Powell Sohkhlet uba long ruh u Nongaiktien jong ka Executive Committee ka Council u la ïathuh ba ka jingïalang ka la ïakut ban thaw ïa ka Operation Team ba kynthup ïa ki nongmihkhmat na ka District Council, na ka tnat Pulit bad na ka Hima Mylliem ban ïaid pahara ha ka por mynstep ka ban sdang naduh ka taïew ban sa wan.
“Ngi la rai ban thaw ïa ka Operation Team ka ban phiah ïa ka kynhun ka ban ïaid pahara ha Ïewduh bad ha khap ïew ba marjan ruh ha ka por mynstep bad ha ka por mynmiet namarba ngi la ïoh pdiang ïa ka jingujor ba ki don ki nongdih drok kiba shong harud lynti ha ka por mynstep. Kumta kane ka buh jingsyier ïa ki nongshong ïew kiba leit sha Ïewduh ha ka por mynstep,” u la ong
U la ïathuh ruh ba ka la don ka jingïakren halor ka jingdon ki briew kiba sahmiet ha Ïewduh bad nangne shakhmat la rai ba kito kiba sahmiet ha Ïewduh kin dei beit thik tang kiba la ïoh ïa ka ID Card na ka Hima Mylliem.
Ha kaba ïadei bad ka jingdih kiad beain, u Bah Sohkhlet u la ong ba ka Council ka la pan jingshai na ka Hima. “na ka liang jong u Syiem u la ïathuh ba ka Hima kam ju ai jingbit satia ban die kiad ha Ïewduh hynrei ki don hi kiba leh beaiñ.”
“Ngi la aiti beit ïa ka Operation Team ban leh ïa kaba donkam,” u la ong.
U EM i/c Trade u Bah W.T Lyngdoh u la ong ba ka jingsngewkhia jong ka Council ka dei hi halor u drok bad ka kiad khamtam eh halor ka jingshngaiñ bad ka jingïada ïa ki nongshong ïew bad ki nongthied nongpet.
U la ïathuh ba ïa ka Operation Team yn sa khlieh da u Superintendent of Enforcement ka KHADC u Bah Arnold Lanong.
U la bynrap ruh ba lada donkam, ka Council kan sa thoh sha ka Sorkar na ka bynta ban pan jingiarap ha ka jingïaid pahara ha ïewduh.
