Shillong, Ïaïong, 25: Uwei u rangbah Garo u la shah kem hajan khappud Assam-Meghalaya ha ka shnong Dudhnoi bad ka pisa thok.
Ïa une u rangbah Garo la tip kyrteng kum u Songsakar Golbin Momin (30 snem ka rta), uba dei u nongshong shnong jong ka East Garo Hills District, Meghalaya.
Ki paidbah ha iew Damra, Dudhnoi ki la ïathuh ba ki la bat ïa u Momin ryngkat bad ki lut pisa thok katba u dang pyrshang ban thied kwai. Hadien kane, ki la aiti noh ïa u sha ki Pulit.
Ïa ki lut pisa 500 thok la kurup noh da ki Pulit kiba don haduh T. 1,41,000 lak.
