Shillong, Ïaïong, 25: Ka jingialang ban thawlad ban ioh ka jingiatreilang kaba jan hapdeng ka India-France -Meghalaya halor kiba bun ki tnad treikam khamtam ha kaba iadei bad ka Sports Training, Coaching, Talent Identification, Sports Tourism bad ban nang pyniaid shakhmat ki jingiajan ki jingiapynbeit ha kiwei kiwei ki tnad treikam ka la long bad u Chargé de mission/Cooperation officer, Consulate General of France, Kolkata u Samuel Bouchard bad u Commissioner and Secretary jong ka tnat Sports and Youth Affairs ka Sorkar Jylla u Dr Vijay Kumar D. Sports ha Main Secretariat, Shillong ha ka sngi Balang.
Ha kane ka jingialang la sakhi lang da u Working President jong ka Meghalaya State Olympic Association (MSOA) Bah John F Kharshiing, u Adviser Sports Bah Lanu Ignatius.
Ha ka jingiakren, u Samuel Bouchard u la ai jingkyrmen ba ka Sorkar France ka don ka jingthrang ban don ka jingiatreilang kaba jan ha ki tnad treikam bapher bapher bad ki kloi ban pynlong ki jingiakren ban ioh ka (joint collaboration) ha ka Talent Identification, Training, Coaching bad katto katne ki jingialehkai kum ka Athletics, Archery, Aquatics, Basketball Badminton bad katto katne ki contact Sports, kum ka Boxing, Judo, karate, taekwondo, bad Football, Gymnastics, Table Tennis, Lawn Tennis, Shooting, Weightlifting, Wrestling bad kiwei kiwei khamtam namar ka jylla Meghalaya ka don hapoh ka jingpynkhreh ban pynlong ia ka National Games lehse ha u snem 2026.
Utei u heh na ka Ri France u la ai ksai bad khot sngewbha ia ki bor (joint delegation) pyniaid na ka Meghalaya State Olympic Association bad Department of Sports ka Sorkar Meghalaya ban leit hi sha France ban ioh ki jingiateh ki jingiapynbeit kiba kham bniah khamtam ha ki katto katne ki kam kilan met.
La don ka jingiakren kaba bniah bha ha kaba la pyntip ia u heh ka Ri France halor ka jingpyrshang kaba kyrpang bad ka sien nyngkong hapoh Ri India da ka jylla Meghalaya ban sei ki sap jong ki samla lyngba ka talent Identification, Elite Pathway Program (EPP) bad ka Super Elite Pathway Program (SEPP) ia kaba la pyntreikam lang da ka MSOA bad DSYA hapoh ka jingkhmih u Ian Campbell OLY na Ri Australia ia kaba u heh na ka ri France u la pynpaw ka jingsngew ban iatreilang khnang ban ioh ban wad ia ki sap ha kylleng ki kyndong skul jong ka jylla.
Hadien ka jingiakren kaba jrong la mynjur ban pruid dak ia ki thong (draft framework of objectives) na ka bynta ban sngewthuh kumno ban iaid shakhmat ha ki jingiatreilang ( joint collaboration on sports) ha ki kam kilan met bad ban phah ia katei ka jingaijingmut sha ka Sorkar Meghalaya ba kin ioh ban nang pyniaid pynbit pynbiang bad ban pynjanai ia ki jingiateh hapdeng ka Sorkar Meghalaya bad ki bor ka Ri France.
