Shillong, Nohprah, 07: Ka Sorkar Jylla ka la rai ban ai tam sa 1.4 akar ka jaka na ka bynta ban pynkynriah ïa ki 342 tylli ki longing na Them Iew Mawlong bad pynpaw ruh ba yn sa lah ban pynkut noh ïa kane ka kam ha ka taiew baar jong u Kyllalyngkot, 2024.
Ïa kane ka rai la pynbna hadien ka jingïalang ba la pynïaid da u Symbud Myntri Rangbah uba peit ïa ka tnat Kam Pohing Bah Prestone Tynsong bad u Symbud Myntri Rangbah uba peit ïa ka tnat Pynroi Sor Bah Sniawbhalang Dhar ha ka jingïalang kaba la long ha Main Secretariat ha ka sngi Palei bad ka Harijan Panchayat Committee (HPC), ba la synran lang da ki nongmihkhmat jong ka Delhi Gurudwara.
Ha ka jingïakren bad ki lad pathai khubor u Bah Tynsong u la ïathuh ba ka HPC ka la pynpaw ïa ka jingsngewkhia halor katto katne ki ishu bad pan por ban ïasylllok shwa bad ki briew kiba sah ha Them Iewmawlong.
“Ngi la buh ïa ka sngi ban ïakren biang, kata, ha lane shwa ka taiew baar jong u Kyllalyngkot bad ngin sa ïakynduh biang ban shim syndon ïa ka rai bakhatduh,” la ong u Bah Tynsong bad bynrpa, “ngi sngew thikna bha ba ngin sa lah ban weng ïa kane ka mat ba la sah pongding ha ka taiew baar jong u bnai Kyllalyngkot,” u la ong.
Haba kylli halor ka Blueprint ba la kham pynbha da ka Sorkar Jylla ha ka jingïalang, u Symbud Myntri Rangbah u la ong, “ka ophis ba mynta jong ka Shillong Municipal Board ka heh kumba 2.14 akar. Namarba kam pat biang ban pynrung lut ïa ki 342 tylli ki longing, ngi la mynjur ban ai jaka sa khyndiat ka jaka, kaba heh kumba 1.4 akar.”
“Ngi la pyni ha ki, (ïa ka modified blueprint) bad ïa kaba sah nangta ngin sa ïakren ha ka wat kaba khatduh,” u la bynrap.
U Bah Tynsong u la kyntait ban ïathuh ïa kaei kaba ka HPC ka la pynpaw.
Shuh shuh u Bah Tynsong u la ong ba ha kane ka jingïalang ym shym la ïakren ïa ka jingpynlut pisa kaba ïadei bad ïa ka jingshna ïa ki ing na ka bynta 342 tylli ki longing. “Ïa mynta ngi la rai da kawei ka sur ban pynkynriah (ïa kiba sah ha them Iew Mawlong) sha ka jaka sah ba thymmai,” la bynrap u Bah Tynsong.
U Secretary jong ka HPC u Gurjit Singh u la ong ba ki hun ïa ka Blueprint jong ka Sorkar bad ki don katto katne ki mat ba kongsan ïa kiba yn dang hap ban ïakren bad kiba sah ha Them Iewmawlong.
“Ka HPC kan sa lum da ka jingïalang ïa ki briew kiba sah ha Them Iew Mawlong ban ïathir ïatai halor ka jingïakren kaba mih na ka jingïalang mynta ka sngi bad ka sorkar,” u la ong.
U General Secretary jong ka Delhi Sikh Gurdwara Management Committee u Jagdeep Singh u la ong ki don katto katne ki kam ïa kiba ym pat lah ban shim rai bad ïa kiba yn dang hap ban shim rai na kawei pat ka liang.
Ka Sorkar ka la hap ban shim ïa ka rai ban pynkynriah ïa ki briew kiba sah ha Them Iew Mawlong ka long hadien ka jingshah shoh pynmynsaw jong ki katto katne ngut ki briew Them Iew Mawlong kaba lam shaduh u pud ban mih ka jingïakynad hapdeng ki Khasi bad ki jaidbynriew Sikh ha u Jymmang, 2018.
Ki bor synshar ka East Khasi Hills District ki la hap ban pynjari da ka korphiw ban tem ïa ka jingbitar jong ki paidbah.
