Shillong, Nohprah, 07: Ka Kashari jong u Special Judge (POCSO) Nongstoiñ, West Khasi Hills kaba la pynshong nongrim na ki sakhi sabut ba la ïoh ha ka jingtohkit, ka la rai pynrem ïa u Tephor Wardkhar bad hukum ban set along haduh 10 snem kynthih nalor kaba daiñ kuna T. 30 hajar kum ka jingpynshitom hapoh ka Section 6 jong ka POCSO Act.
Ha u kyrwoh ba la phah da u Superintendent of Police ka Eastern West Khasi Hills sha ki lad pathai khubor ha ka sngi Palei, la pyntip ba ki Pulit ki la ïoh pdiang ïa ka ejahar ha ka 18 tarik Rymphang, 2017 ba iwei i heprit kynthei i la shah leh beijot ha u Tephor Wardkhar.
Ki Pulit ki la register case pyrshah ïa u nongleh kam bymman ha Mairang Police Station hapoh ka Section 5(n)/6 POCSO Act bad ïa ka jingtohkit la bynshet ha ka WPSI RR Marak jong ka Mairang Police Station bad ïa ka case la pynngat kyndon da ka Investigating Officer hapoh ka Section 5(n)/6 POCSO Act.
Ka Kashari u Special Judge (POCSO) Nongstoiñ, West Khasi Hills ka la pynmih ïa ka rai ba la pynrem ïa u Tephor Wardkhar ha ka 30 tarik u bnai baladep.
