Shillong, Nailur, 08: Ka Sorkar Jylla ha ka Lah Sngi u Blei ka la pyntip ba ka pyllait ïa ka baibam sha ki 10, 346 ngut ki samla pule Scheduled Tribe ha ka wat kaba ar (second installment) hapoh ka Umbrella Scheme jong ka Post Matric Scholarship jong ka Academic Year 2024–25 (Fresh and Renewal) kiba dang pule ïa ka Professional Degree, Postgraduate, bad Doctoral Course.
Ha u kyrwoh ba la phah da u Director jong ka Higher and Technical Education, Shillong, u la ong, “ka pisa ba T. 6.17 klur la pyllait na ka pisa bym pat pynlut, kaba dang sah na ka daw ba ki don katto katne ki nongaplai ki bym pynïasoh ïa u Aadhaar Number bad ki Bank Accounts jong ki.”
“Katkum ki kyndon, ka Ministry of Tribal Affairs, ka Sorkar India kam shym la pyllait satia ïa ka pisa Installment lada ka pisa bym pat pynlut ka dang don ha ka SNA Scholarship Account. Hadien ba la pyntreikam ïa kane ka pisa ba dang sah, ka tnat mynta kan ïaid shakhmat ban pyllait noh ïa ka Second Instalment ba la ïoh na ka Sorkar India,” la pyntip u kyrwoh.
“Ban pyndap ïa ka baibam jong ki 60,226 hajar ngut ki nongaplai ba dang sah, ka tnat ka donkam pisa sa T. 102.4 klur. Ïa kane ka pisa la pyllait da ka Sorkar India ha ki 2–3 Instalment. Hynrei, da ka jingbthah jong u Myntri Rangbah, ka tnat kan sa pyllait lut baroh shisien pyllait ïa ka pisa da kaba mang pisa na ka pla tyngka jong ka Sorkar. Nalor kata, ïa ka pisa baibam ba pura ba dang sahkut jong ki samla pujle yn sa pyllait ha ka taiew baar jong u bnai Nohprah, 2025,” la pyntip shuh shuh u kyrwoh.
“Na ka bynta ki jingtip kiba kham bniah, ki nongaplai ki lah ban thoh sha ka: [email protected],” ong u Director ka Higher and Technical Education, Shillong.
