Shillong, K’lyngkot, 20: Ka BJP ka la pynkhamti biang ha u Rikman G. Momin ban dang bteng kum u nongïalam ka BJP ha Meghalaya.
Kane ka samoi treikam ba thymmai jong u President ka BJP Meghalaya State Unit ka la ïatakhuh ruh bad ka jingdon jong ka elekshon MDC ha ki ar tylli ki Autonomous District Council ha rilum Khasi bad Jaintia.
Ha ka samoi treikam jong ki snem ba la leit, u Rikman u la lah ban pynbeit thymmai ïa ka party ha Meghalaya da kaba pynthikna ïa ka jingïatreilang hapdeng ki nongïalam, ka jingïatreilang hapdeng ki dkhot bad ka jingshaniah ha ka lawei baphyrnai hapdeng ki nongïalam jong ka BJP.
Ka jinglong nongïalam jong u ka la khring ïa ki nongïalam bad ki nongtrei na kiwei pat ki party bad ka BJP ha Meghalaya ka la nang kiew ha ka jingbun paid bad la khmihlynti ba bun kiwei ruh kin sa wan pynïasoh sha ka party ha ka samoi kaba biang.
Ka jingkiew jong ka BJP ha ka kyrdan ba hakhmat eh ka lah ban pynthikna ba ki skhim bapher bapher kiba ïadei bad ki paidbah lyngba ka sorkar ba la ïalam da u Myntri Rangbahduh Narendra Modi ki la treikam bha ha Meghalaya.
