Shillong, Naiwieng 01: Ka Hynñiewtrep Achik National Movement (HANM) ha ka sngi Thohdieng ka la pynbna ba kan leit ban pynlong biang sa shi wat ïa ka jingïashong kyllaiñ myngor ha nongbah Delhi ban pynbor ïa ka sorkar pdeng ba kan pyntreikam noh mardor ïa ka Inner Line Permit (ILP) bad ka jingpynrung ïa ka ktien Khasi bad Garo hapoh ka khyrnit Baphra jong ka riti synshar jong ka ri India.
Haba kren sha ki lad pathai khubor u President ka HANM u Bah Lamphrang Kharbani u la ong ba ki Pulit ka Delhi ki la dep ban ai ka jingbit ïa ka seng ban pynlong ïa kane ka jingïakhih da kaba shong kyllaiñ myngor ha Jantar Mantar ha ka 25 tarik u bnai Rymphang, 2025.
U la ïathuh ba ha ka por ba ki la leit sha Delhi, ki nongmihkhmat jong ka HANM ki la ïakynduh ïa u MP jong ka Rajya Sabha u Rakhesh Sinha, uba dei ruh u nongïalam ka BJP uba khmih ïa kane ka thaiñ shatei lammihngi bad ki la aiti ruh ha u ïa ka jingthoh ba la phah ruh sha ka President jong ka ri India, nangta u Myntri Rangbah duh ka ri, sha u Myntri Khynnah uba khmih ïa ka tnat Kam Pohïing ha kaba ïadei bad ka jingdawa ban pyntreikam noh mardor ïa ka ILP ha Meghalaya bad kumjuh ruh ka jingkynthup ïa ka ktien Khasi bad Garo hapoh ka Khyrnit Baphra jong ka riti synshar ka ri India.
U la bynrap ba u MP u la pynthikna ïa ki dkhot ka seng ban ïasyllok ïa kine ki jingdawa hapoh ka Parliamentary Standing committee jong ka sorkar pdeng.
“U MP u la kular ban wan sha Meghalaya ban ïasyllok bniah ïa kine ki mat,” la iathuh u Bah Kharbani.
