Shillong, Nailar, 27: Ki nongïalam jong ka Khasi Students Union (KSU) Mawphlang Unit ha ka sngi Baar ki la leit jurip ïa ka Science and Commerce College kaba don ha ka shnong Mawphlang ha kaba ki la lap ba ka jingshna ïa kane ka College ha ka jaka ba la ai sngewbha da ka Hima Mawphlang ka dang sah khongreng haduh mynta.
Ha ka jingleit jurip ïa kane ka College ba dang shna la lamkhmat da u General Secretary jong ka KSU Mawphlang Unit u Samla Banïengkhem Kharbani ryngkat ka jingsynran lang jong u Information and Publicity jong ka KSU Central Executive Council u samla Pynshai Rani.
Ka jingleit jurip jong ka seng ïa kane ka shlem pule ba dang shna, ka long hadien ba u Myntri ka tnat Pule Puthi ka Sorkar Jylla u Rakam A. Sangma ha u Nailur, 2023 u la pyntip sha ka seng ba naduh u bnai Naitung, 2024 yn sdang noh ïa ka jingai jinghikai ha kane ka College hynrei kaba sngewsih ka long ba haduh kine ki sngi ruh ka jingshna ïa kane ka shlem pule ka dang sahteng bad ki dang bun byllai ki jingtei kiba dang sahteng haduh mynta naduh ka jingshna ïa ki kamra class, ka hostel bad kiwei kiwei.
