Shillong, Jylliew, 27: Ka jingpynmih jong ka Commissioner of Food Safety, Meghalaya ka Kong RM Kurbah ia ka jingpynbna ha ka 24 tarik u Jylliew, 2023 ba la weng noh ia ka jingkhang ban wanrah ia ki dohkha nabar ka jylla ka la pynkmen haduh katta katta ia ki nongdie bad ki nongkhaii dohkha kiba don hapoh ka lama jong ka Khasi Jaiñtia Fish Wholesaler and Retailer Association kiba ju im kamai jakpoh manla ka sngi ha basa die dohkha ha Iewduh.
Hynrei hapdeng kane ka jingkmen, ki nongdie bad ki nongkhaii dohkha ki la pynpaw ia ka jingsngew bynñiaw na ka jingbym ai kaiphod mardor jong ka tnat Fisheries wat hadien ba ladep leh test ia ki dohkha kiba wanrah nabar ka jylla khnang ban pynthikna ba kim dei satia kiba la injek da ka dawai Formalin.
Ia ki dohkha ba wanrah nabar jylla la leh test da ki Ophisar na ka tnat Fisheries ha khlieh Iewduh ha ka sngi Baar.
Uwei na ki nongialam jong ka Khasi Jaiñtia Fish Wholesaler and Retailer Association u Bah C.W. Wankhar ha ka jingiakren bad ki lad pathai khubor u la iathuh ba ki ophisar ka tnat Fisheries ki la pyntip ba kin sa ai ia ka kaiphod ba ladep leh test kham hadien sha ki nongkhaii bad ki nongkhaii kiba ju thied ia ki dohkha kiba wan nabar ka jylla kin sa leh ia kaba donkam ynda ki la iohpdiang ia ki kyndon na kane ka tnat.
Katkum ka jingiathuh jong u Bah Wankhar, ki dohkha ba la leh test ki dei kiba wanrah na Andhra Pradesh bad ia kiwei kiwei ruh ki dohkha ba la wanrah nabar ka jylla.
“Lada ka slem palat ka jingai kaiphod, ka dohkha kaba la wanrah nabar ka jylla ngin hap ban pynphai noh bad ngim lah ban ap sah haduh ar ne lai sngi ban shu buh sah ia ka dohkha,” u la ong.
“Ka jingkwah jong ngi ka long ba kin (tnat Fisheries) leh test mynta bad kin ai noh ia ka kaphod mynta hi. Shisien ki la leh kumta bad ha ka sien kaba ar ngim tip shuh katno sngi ka shimpor ban ai ia ka kaiphod,” la bynrap u Bah Wankhar.
Ki nongdie dohkha ki la ong ruh ba ka Sorkar ka dei ban sngewthuh ia ka jingeh jong ki nongdie bad ki nongkhaii dohkha namarba ban pynslem ia ka kaiphod ba ladep leh test kan buh jingeh ia ki.
“Dei ban leh test beit hangto hangto kumba leh ka Food Safety khnang ba ngin ym duhnong,” la kyrpad ki nongdie dohkha.
Ki la pynpaw ruh ba ka jingpynmih jingpynbna da ka Commissioner of Food Safety ka shu long kynsan bad khlem da kdew la yn leh test manla ka sngi lane yn leh shisien lano.
