Shillong, Jylliew, 27: Saw ngut ki briew ki la mynsaw jur na ka jingpom jong u pyrthat ia kawei ka ing trep ha ka shnong Umsohlait, Ribhoi District bad kane ka la jia ha ka lah sngi U Blei katba u slap u dang jur bha ha ka por kumba 2 baje nohphai sngi.
Ha kane ka jingjia, baroh ki jingdon jingem hapoh kane ka ing bad kynthup ruh ia ki mar rep jong ka Kong Christina Mynsong ki la ingkhong lut ploiñ.
Ka Kong Christina Mynsong ha ka jingiakynduh bad ka Batesi Tv ka la iathuh ba ki saw ngut kiba la mynsaw ha kane ka jingpom u pyrkhat ia ka ingtrep jong ka, ki kynthup ia u khun jong ka uba la 11 snem ka rta ryngkat bad iwei i khunlung ba dang 4 snem ka rta bad uwei pat uba la 30 snem ka rta. Ha kane kajuh ka jingjia, u para kynsi jong ka ruh uba la 20 snem uba don ha ing ha kane ka por u la ngat lang ha ka jingmynsaw na kane ka jingpom u pyrthat ia kane ka iing.
Ia u khun jong ka Christina Mynsong uba la 11 snem la pynkit sha Nazareth Hospital, Shillong ban ioh jingsumar, katba lai ngut kiwei pat ki dang don mynta hapdeng ka jingshah sumar ha Civil Hospital, Shillong.
Ka Kong Christina ka la kren bynñiaw halor kane ka jingduh noh ia la ka jong iing ka sem bad ia ki mar ki mata bad ki mar rep kiba don hapoh ka iing ha kane ka jingjia.
Ka la iathuh ba tang shu ioh jingtip halor kane ka jingjia ka la leit mareh bran bran sha la ing hynrei tang shu iohi ba ka ing ba ka la kem ding bad ingkhong lut ka la kyllon ha madan hapdeng ka jingkem tlot.
“Tang shu iohi ba ka ïing ka la kem ding nga la pyrkhat nyngkong eh ia u khun tip kan jia aiu. Hynrei donbok ba nga dang iohi biang ia u khun wat hapdeng ka jingmynsaw,” ka la ong bad bynrap, “dei ka jingiarap jong ki para shnong ba la lah ban pynkit ia kiba mynsaw shane sha Shillong.”
Ka la iathuh ruh ba ka don pisa ha lade tang T.1200 ban siew ia ka bai Ambulance bad ong ruh ba kam tip shuh kumno kan leh nangne shahkhmat namarba kam don pisa wat tang shi naïa ha pla ban siew ia ka bai sumar jong u khun hapoh Hospital.
“Nga shahniah beit tang ha U Blei ba Un pyniaid ia ka jingim jong nga,” ka la ong.
