Shillong, Rymphang 20: Ka Hynñiewtrep Integrated Territorial Organization (HITO) Sengkmie ba la lamkhmat da u Political Secretary u Samla Garry Myrboh ha ka sngi baar ha ka por kumba 9:00 baje eiei mynmiet ki la leit ban jurip kynsan ïa ki dukan kiba don ha iewduh hadien ba la ioh ia ka jingujor na ki paidbah ba ki bor synshar jong ka ophis u Syiem ka Hima Mylliem kim shym la shimkhia ha kaba iadei bad ka hukum kaba ki la pynmih ba yn ym shah shuh ia ki briew ban sahmiet ha ki dukan ha Iewduh.
Ka Seng ha kane ka jingjurip ka la lap ba ki don bun ki bar jylla kiba sahmiet ha ki dukan, kum ha ki dukan diesha ha kaba la lap ia ki bar jylla kiba sahmiet haduh 8 ngut bad don ruh kiba sah haduh 15 ngut ha kawei ka dukan.
Na ka liang jong ka seng ka la shu shim tang ia ki kyrteng jong ki bad shen ka seng kan sa leit ujor sha u Syiem jong ka Hima Mylliem ne sha ka Khasi Hills Autonomous District Council.
Kaba pynlyngngoh ïa ka Seng ka long don ruh ki bar jylla kiba sah ha kine ki dukan ki la pynlong ruh kum ka jaka dih kynja bad ki don ruh ki jaka sah ba ki aiwai pateng ia kiwei pat kiba trei sha kiwei ki jaka da kaba shim pisa ha ka dor 200 tyngka shimiet kum ka bai thiah ha kine ki dukan.
Ka seng ka la byrngem ba kan pynlong ia ka jingjurip kaba manla ka por ia kine ki dukan ha ïewduh namarba la iohi ba bun ki bar jylla kiba sahmiet ha kine ki dukan ki dei kiba wan na ka jylla Assam, na ka ri Nepal bad na kiwei kiwei ki jylla.
