Shillong, Rymphang 21: U State Vice President jong ka BJP Meghalaya State Unit u Bah Wankitbok Pohshna ha ka sngi Balang u la ong ba ka BJP kam dei satia ka NPP.
‘Dang shen ngi la iohi ha ki kotkhubor bad iohsngew sharum shaneng ba ka BJP bad ka NPP ki dei kijuh. Kane ka jingpyniasriem ia ka BJP bad ka NPP ka long tang ka jingpynthame ban ialam bakla ia ki paidbah ka jylla Meghalaya,” ong u Bah Pohshna ha u kyrwoh ba la phah sha ki lad pathai khubor.
“Baroh ki tip ba ka BJP ka dei ka National Party ba la seng hadien jong ka Jan Sangha ha ka 4 tarik u Iaiong 1980 bad ka nongrim jong ka seng ka dei halor ka ktien Intergral Humanism kaba la wanlam da u khrawpyrkhat u Pandit Deen Dayal Upadhaya. Ka dei ka party kaba burom ia ka kolshor jong ka ri, kaba phaikhmat sha ki jingdonkam ban kyntiew ia ki jylla katkum ka rukom im jong ki nongshong shnong bad kaba lamkhmat ban kyntiew ia ka roi ka par jong ka ri. Na ka bynta ka BJP ka ri ka wan hakhmat duh bad ka trei borbah ban ai jingmyntoi ia ki paidbah,” u la ong.
“Lah ban sakhi ia kita baroh lyngba ki skhim ba ka sorkar BJP ka la wanlam sha ki paidbah kum ka Ujjala, Vishwakarma, PMAY, Atal Pension Yojana, Jan Dhan Yojana, Ayushman Bharat, Rashtriya Krishi Vikas Yojana, Pradhan Mantri Suraksha Bima Yojana bad kiwei kiwei. Kino kita kiwei ki party kiba la lah ban wanrah ia ki jingmyntoi shibun na ka bynta ki paidbah? Ym don wat ka NPP ruh kan nym lah? Ong u Bah Pohshna.
“Ka BJP mynta ka synshar ha ki 18 tylli ki jylla ha ka ri bad ia ka Sorkar Kmie ruh la synshar da ka BJP bad ban shu nujor ka NPP tang ha kane ka thain Shatei Lam mihngi ruh kam pat da don kyrteng klet noh sha kiwei ki jylla shabar ka thain. Ka NPP ka dei kaba la mih na ka NCP kaba la pait na ka seng Congress ha kito ki snem,” u la ong.
“Da kaba ong ba ka BJP ka dei ka NPP, ki klet ba ka pyrthei baroh ka tip ba u President rangbah ka BJP dei u Jaggat Prakash Nadda bad u Myntri Rangbahduh ka ri dei u Narendra Modi bad ym don uwei ruh u dkhot ka NPP uba lah ban tuklar ha ki kam pohiing jong ka BJP. Ka NPP ka dei tang ka dkhot ha ka NDA ka Sorkar Synrop ba la thaw ha ka por ba la long Myntri Rangbahduh u Atal Bihari Vajpayee ba la khladnoh. Ha kane ha jylla, ka BJP ka shu ai jingkyrshan ia ka Sorkar Synrop ba la lamkhmat da ka NPP kumba leh lang kiwei,” la pynshai u State President.
“Kaei kaba pyniapher ia ka BJP na kiwei pat ki party dei ba ka iengskhem ha ka nongrim ban pyrshah ia ka bamsap, ka shahliang bad ban kyntiew ia kawei ka longing ha ka sain hima sima (dynastic politics). Ym pat don ba lah ban mih bujli ia u Narendra Modi bad um salia iano iano kiba kren pyrshah bad kam pher la ki dei na ka jylla ne na kiwei ki party,” ula ong.
“Ngi iaiban ia kane kawei ba ka BJP ka iakhun hi marwei ha ki elekshon bad kam ju donkam ban iasynroplang bad kiwei. Ka party ka la long kaba la khreh lypa ban wan biang sha ka bor synshar ha ka ri ynda la dep ka elekshon MP bad hadien ka jingwanphai na ka lympung iakynduhlang jong ka party kaba dang shu dep shen ha nongbah New Delhi ka BJP Meghalaya ka la nang iaid shakhmat ban pynkhreh ia ka elekshon MP da kaba pynkhlain ia ki tnat hangne ha jylla bad ka la sdang ban pyntyllun ia ki prokram ‘leit sha ki shnong’ bad ‘kynduh ia ki paidbah’ ki ban long ki lad ban kynduh ia ki nongthep vote ban pynshai halor ki kam jong ka seng hapoh ka jingialam jong u president ka seng u Rikman Momin,” u la ong.
U la ong ruh ba katkum ka rukom ka Central Parliamentary Board jong ka party kan sa ai ia ka rai khatduh halor ki kyrtong ki ban ioh ia ka tiket jong ka party na ka bynta ka Shillong bad Tura.
