Shillong, Nailar, 12: Ka jingtwa jong ka khyndew ktieh bad ki maw kaba la lynshop hapdeng ka surok National Highway-06 ha ki bynta jong ka shnong Sonapur bad ha ka shnong Kuliang, East Jaiñtia Hills District ka la wanrah ïa ka jingdheng kali kaba jur bad ki kali ki la sahkut hapdeng surok khlem lait lynti shuh ban jam shakhmat namarba ki maw rit ruh ki la tuid lang bad ka khyndew ktieh.
Kane ka jingtwa jong ka khyndew hapdeng jong kane ka surok kaba pynïasoh ïa ki katto katne ki jylla ha ka thaiñ Shatei Lammihngi ka dei ruh na ka jingjur shaba palat jong u slap ha East Jaiñtia Hills kat haduh ba ki nongtrei jong ka National Highway Authority of India (NHAI) ki la hap ban durut ban pynkhuid ïa ka khyndew bad ïa ka ktieh kaba la tuid hapdeng surok.
