Shillong, Risaw, 17: Ka jingpyntrei ïa ka surok naduh Mawphlang ter ter shaduh Balat ka la pynkmen ïa ki paidbah nongshonng shnong kiba ju ïaid lynti na kane ka surok ban wan sha sor Shillong hynrei katba nang ïaid ki sngi suki pa suki la sakhi ïa ka jingbha khyndiat hapdeng jong ka surok naduh Mawphlang hynrei ha ka thaiñ Lyngiong, Tyrsad shaduh Weiloi, Mawsynram terter shaduh Balat bad Mawkyrwat ki paidbah ki sam umdum ban ïohi ba shiteng na ka surok ka la bha namarba ladep siang rong katba shiteng pat ym pat lah wat tang khyndiat ruh ban siang rong.
Ka jingsniew jong ka surok ka la buh jingeh ïa ki kali khamtam ïa kiba kit ïa ki nongpang ban kit sha ki jaka ai jingsumar.
U Bah Banshai Marbaniang ha u kyrwoh u la pyntip ba katkum ka jubab RTI ba la ïoh pdiang na ka ophis PWD (Roads) Mawphlang Division, la pyntip ba naduh ki bnai ba sdang jong u snem 2024 la shna pynbha ïa ka surok lyngba ka Mawphlang Cart (MC) Road bad ka Mawphlang-Balat (MB) Road kumba la shimti naduh Wah Umpatiah bad ban pynkut shaduh Weiloi katkum ka jingjrong kilomitar kumba la kheiñ lang baroh ka long kumba 28.90 Kilometre.
Ka tnat PWD (Roads) Mawphlang Division ka la pyntreikam ïa kane ka surok lyngba ka skhim “Improvement And Rehabilitation Of Pavement Including Widening To Intermediate Lane.”
Katkum ka RTI la sakhi ruh ba ka PWD (Roads) Mawphlang Division ka la aiti sha ki ar ngut ki Kontraktor, kata sha u Bah Bungsing Sohphoh bad ka Kong Banalari Khongwir.
U Bah Marbaniang u la ïathuh ba ka jubab RTI ka la pynpaw ba la aiti mar shiteng sha baroh arngut ki Kontraktor ïa ka kam ban shna pynbha ïa kane ka surok kumba 14.450 Kilometre marwei naduh kaba shna pynheh bad ban siang rong pura khlem da pynbakla katkum ka Project Plan. Ka pisa ba la mang ban shna pynbha ïa kane ka surok ka la kot kumba T. 50 Klur bad ïa kane ka pisa ruh la sakhi ba yn hap ban phiah mar shiteng sha baroh arngut ki Kontraktor ba dei ban ïoh.
U la pyntip ruh ba ïa ka Work Order ba la aiti ki arngut ki Kontraktor naduh u bnai Kyllalyngkot, 2023 ban sdang ïa ka jingtrei bad la ai por ban pyndep hapoh 24 bnai.
U Bah Banshai u la hiar jurip ruh dalade bad la shem ba ka jingshna ïa ka surok ka la buh jingeh ïa ki paidbah ha ka leit ka wan na kane ka surok namarba shiteng ka surok ba la mang sha u Bah Bungsing Sohphoh na ka bynta 14.450 kilometre ladep shna pynbha lut bad ki katto katne ki bynta ba hapdeng jong ka surok babha la mih ruh kiba la pait la pra bad pei thliew malu mala.
“La hap ban kyntu ïa u Kontraktor ba shimti ïa kane ka jingtrei ban shna pynbha shuh shuh nalor kaba la dep baroh khlem da pynsah dien mong,” la ong u Bah Banshai.
“Ki bynta kiba dang kynthup ïa ka surok kaba ïaid na kajuh ka bynta bad dang sahkut hapdeng ka jingsniew kaba dang jot pura ka dei kaba la shimti da ka Kong Banalari Khongwir ka bym pat lah ban shna wat tang khyndiat ruh.
contractor khlem pat da lah ban pynbha tang khyndiat ruh. Nga kyntu ïa ka Kong Banalari Khongwir ban shimkhia ïa kane ka kam na ka bynta ban pyndep noh mardor khlem da pynslem shuh kumba la buh lyngba ka PWD (Roads) Mawphlang Division,” u la ong.
“Lada ka Kontraktor kam lah shuh ban pyndep katkum ka por ba la buh ka ladei ban aiti noh ïa ka Work Order sha ka ophis PWD (Roads) Mawphlang Division khnang ba kan aiti noh sha kiwei kiba lah ban pyndep khlem da kynran dien,” u la ong.
“Lada ka Kontraktor ka ïaidlait katkum ka bynta ba la buh, ka tnat treikam, ka dei ban wanrah ïa ka Legal Action, Contract Termination, Penalties katkum ki kyndon Aiñ ba la buh khlem da pynbakla katkum ba la paw ha ka RTI Act 2005 kaba la ïoh pdiang,” la bynrap u Bah Banshai.
