Shillong, Naitung, 15: U MLA jong ka Nongpoh Constituency u Bah Mayral Born Syiem ryngkat bad u MDC u Bah Balajied Rani ha ka Lah Sngi u Blei ki la leit ban ïakynduh ïa u Deputy Commissioner jong ka Ri Bhoi District uba dei ruh u Chairman jong ka District Selection Committee (DSC) ban kyntu ba un pynbna noh ïa ka result DSP jong u snem 2020-2021 ïa kaba ym pat shym la pynbna satia haduh kine ki sngi.
Kane ka jingshimkhia jong u MLA ka long halor ka jingïoh ujor na ki samla kiba thep ïa ki kam bapher bapher bad kiba sngewkhia halor ka jingpynslem ban pynbna ïa ka result.
Ha ka jingïalang kaba la long ha ophis treikam jong u Deputy Commissioner ka Ribhoi u Abhilash Baranwal la ïadon lang ruh u Member Secretary jong ka DSC u Raja Brahma, ha kaba la ïakren sani bha halor ka jingpynslem ban pynmih ïa ka result.
Ha ka jingïakren bad ki lad pathai khubor hadien ka jingïalang u Bah Syiem u la ïathuh ba ka jingïakren ka la long kaba seisoh.
U Deputy Commissioner bad u Member Secretary ki la kular ban shimkhia halor kane ka kam ban pynstet noh ïa ka kam khnang ban ïoh pynbna ïa ka result jong ka post DSP jong u snenm 2020-2021 shwa u Nailur lane hapdeng u Nailar mynta u snem khnang ba kan long ka jingmyntoi ïa ki samla thepkam.
U la ïathuh shuh shuh ba ka daw halor ka jingslem ban pynbna ïa ka result ka dei na ka daw ka jingbym don ka Roster System bad bun na ki tnat treikam ki dang pynkhreh ïa ka Roster System katkum ka Reservation Policy.
Ha kajuh ka por u la ïathuh ba u la kyntu ïa u Chairman bad ïa u Member Secretary jong ka DSC ba kin kham buh shwa hakhmat ïa ki samla na Ri Bhoi ban pyndap ha ki kam kiba lait hapoh ka DSC Ribhoi.
